Jesaja 55: 1-13
Daar is al beweer dat Jesaja 55 vir ons ’n harde les oor God se genade wil gee. Daar word dan beweer dat vers 1 se uitnodiging aan selfs dié wat geen geld het nie om te kom koop en eet, sou beteken dat hierdie uitnodiging na alle Jode in die ballingskap sou gaan. ’n Mens kan jou indink dat so ’n uitnodiging die getroue Jode wat die wet elke dag getrou nagekom het, sou ontstel. Hoe kan dit wees dat ook die ontroues en twyfelaars gered kan word? Die agtergrond vir hierdie verduideliking word dan in verse 8 en 9 gesoek waar ons lees dat God se gedagtes en sy optrede nie dieselfde is as dié van die volk nie. Dit sou dan beteken dat God se genade en vergewing veel groter is as wat ons ooit kan dink. Want sien, God se genade is nie net bedoel vir die getroues nie. Ook die ontroues en twyfelaars kan gered word.
Soos met die getroue gelowiges in die tyd van Jesaja, wil ons ook nie hoor dat daar ook vir die ontroues en twyfelaars ’n gelyke kans op verlossing is nie. Hoe kan sondaars en misdadigers ook gered word?
Vir ons hier in die Adventtyd wil Jesaja 55 egter ’n boodskap van hoop bring. In die eerste plek kry ek en jy, wat weet dat ons nie volmaak is nie en God soveel keer teleurstel, die versekering van ’n kans op verlossing. En tweedens verseker dit ons dat God se genade baie groter is as wat ons ooit wil of kan verstaan.
Is dit nie juis wat Jesus kom doen het aan die kruis nie? Vir wie het Hy na hierdie wêreld gekom en aan die kruis gesterf? Vir die getroues? Ja, sekerlik. Maar juis ook vir hulle wat verlossing nodig het. En watter groot stuk troos lê hierin vir my en jou! Kersfees herinner ons juis weer dat Jesus gekom het om ons sondes van ons weg te neem en ons met God te versoen. Dit is die harde werklikheid van God se genade! Gelukkig is sy gedagtes nie soos ons gedagtes nie.
Ds Willem Sauer, Waterberg
