Psalm 19: 1-15
Psalm 19 is ’n besondere lofsang wat ons herinner aan God se skepping en sy woord. Die Psalm begin met ’n lofprysing aan God se skepping met die woorde: Die hemel getuig van die mag van God, die uitspansel maak die werk van sy hande bekend (vers 2). Hierdie woorde herinner ons daaraan dat God se heerlikheid en grootsheid sigbaar is in die skepping om ons. Die son, maan en sterre vertel van sy mag en wonderwerke, en die natuur herinner ons aan sy skeppende krag en liefde. Dit is ’n herinnering dat God alomteenwoordig is en dat sy krag en wysheid onmeetbaar is. Psalm 19 gaan ook verder as net ’n lofsang oor die skepping.
Die tweede deel van die Psalm beskryf die waarde van God se woord. God openbaar Hom aan die mens deur sy skepping en deur sy woord, wat aan die mens leiding bied. Die Psalmdigter sê: Die woord van die Here is volmaak: dit gee lewe. Die onderwysing van die Here is betroubaar: dit gee wysheid aan dié wat nog onervare is. Die bevele van die Here dui die regte koers aan: dit bring blydskap. Die gebod van die Here is helder: dit gee insig (verse 8-9). Die Psalm herinner ons dat die woord van God waarde en betekenis aan ons lewens gee. Die krag van God se woord in die lewe van die mens gee nie net leiding nie, maar ook insig en wysheid.
Wat beteken hierdie Psalm vir ons vandag? Die boodskap is duidelik: Dit is ’n uitnodiging om ons te verwonder oor die grootsheid en almag van God. In ons tyd is dit maklik om vasgevang te raak in die druk van die lewe en te vergeet van die skepping en die alomteenwoordigheid van God, maar ons word herinner aan die wonderlike werk van God in die skepping, wat Hy aan ons toevertrou het. Dit is ’n roeping wat geldig is vir elke Christen, om ons te wy aan die bestudering van die Woord van God en om die Woord in ons daaglikse lewens toe te pas. Deur die Woord van God word ons gelei na die waarheid, word ons versterk in ons geloof, en word ons aangemoedig om te groei in ons verhouding met God.
Dr Rudy Denton, Potchefstroom-Studente
