Matteus 2: 9-12
Die geboorte van kinders laat ’n mens se lewensweg dikwels ’n ander koers inslaan. Daardie wonderwerk-mensie bepaal nou ons nuwe roetine en optrede. Ons kan vir ure na die pasgebore kinders staar en wonder watter vreugde dan groter is. Dit is kinders wat dikteer waarheen ons die meeste reis, en dit is dikwels na dokters en familie. Dit is ook kinders wat die omvang van die bagasie bepaal. Nie net meer kos en klere nie, maar die agterste sitplekke wemel van speelgoed.
Die sterrekykers se reis stop eers in Betlehem. Dit is hier waar hul bagasie verander. Hulle het die goud, wierook en mirre aan die Koning as geskenke uitgedeel. Nou breek hul terugreis aan, weer deur Jerusalem, om aan Herodes verslag te doen. ’n Engel verskyn aan hulle om te waarsku: Volg ’n ander pad! Hierdie ompad was hul redding, maar dit was die opstand van Herodes wat alle Joodse seuns wat onlangs gebore is, wil doodmaak. Daarom vlug Josef en Maria na Egipte toe.
Met Christus se geboorte word ons reis ook aangepas. Voor Christus was dit ’n pad van sonde met swaar bagasie van ongehoorsaamheid. Dit was ’n verdwaalde en verlore pad. Maar Christus se geboorte bring ’n nuwe pad – die pad van die ewige lewe. Dit is dalk ’n kronkelpad, maar ’n pad wat hoop en redding bring. Ons reis nie meer met oorlaaide skuldgevoelens en ongehoorsaamheid nie. Daardie swaar rugsak van die sonde is nou afgegooi. Die juk is van ons skouers af en ons kan nou die reis met vreugde aanpak. Ons reis nou met ander bagasie – ons reis met die verlossing en genade wat God aan ons geskenk het.
Ds Lammert van Rooyen, Lichtenburg-Oos
