Psalm 46
Vandag vier ons die gebeure van die Kerkhervorming. Ons het ons totale manier van kerkwees, die wyse waarop ons die Bybel verstaan en oor God nadink, te danke aan die Kerkhervorming. Psalm 46 was een van die Kerkhervormer Martin Luther se gunstelingpsalms. Martin Luther het self gesê dat die bestudering van die Psalms sy liefde vir God aangevuur het. Hy het boonop sy loopbaan as professor begin met ’n reeks lesings oor die Psalms.
Maar Psalm 46 het vir Luther in die besonder uitgestaan omdat hierdie Psalm op ’n spesifieke manier van God en God se verhouding met gelowiges praat. Aan die een kant word God beskryf as ’n Almagtige, groot en sterk Heerser – God is transendent, verhoog bo alles. Aan die ander kant word die Here beskryf as ’n persoonlike God wat teenwoordig is in die lewe van gelowiges. Dié groot, magtige God is, met ander woorde, altyd persoonlik teenwoordig by sy kinders en betrokke by gelowiges se lewens. Dit noem ons die immanensie of nabyheid van God. Martin Luther se ontmoeting met God het juis gekom toe hy God in die Bybel leer ken as ’n genadige, persoonlike God, nie ’n God wat daar ver is nie, maar ’n God wat weliswaar bemoeienis maak met elke mens.
Psalm 46 is ’n geloofsbelydenis wat rekening hou met beide hierdie aspekte van God: sy almag en verhewendheid, maar ook sy nabye teenwoordigheid. Dit word verwoord waar die Psalmdigter God bely as die bron van Israel se krag. Die Here is soos ’n toevlug waar Israel rus vind. Hy is die Beskermer, die skuilplek wat deur sy nabyheid veiligheid bied wanneer sy kinders ’n krisis ervaar. Hierdie versekering dryf die Psalmdigter daartoe om die Here se lof te besing.
Die vyf sola’s wat uit die Kerkhervorming ontwikkel het, is: Christus alleen; Skrif alleen; genade alleen; geloof alleen; en aan God alleen die eer. Psalm 46 omvat al vyf hierdie formules, want dit herinner ons aan die belangrike geloofswaarheid dat God alleen ons skuilplek en beskutting is. Deur die redding in Jesus Christus het God boonop vir ons finale veiligheid gebring.
Gesang 476
Ds Marina Kok-Pretorius, Potchefstroom
