1 Petrus 2: 1-6
Lente word gewoonlik gesien as ’n tyd van ongekende groei, wanneer die natuur sy prag herstel, ná die koue aanslae wat die winter daarop agtergelaat het. Dit is ’n tyd wanneer die eerste tekens van nuwe lewe weer sigbaar word en die natuur met ’n rykdom van kleure versier word. Groei is egter nie net tot die natuur of spesifieke seisoen beperk nie. Die groeiproses vorm onlosmaaklik deel van ons totale menslike bestaan. Reeds voor geboorte is daar 40 weke se belangrike groei en ontwikkelling wat by ’n baba moet plaasvind, en dan is die regte voeding van onskatbare waarde. Dit stop nie daar nie, want vir baie jare daarna word hierdie groeipatroon voortgesit totdat ’n volwasse vlak uiteindelik bereik word, waarna dit stelselmatig weer begin afneem.
Petrus gebruik hierdie groeiproses van ’n baba as metafoor om die noodsaaklikheid van geestelike groei te verduidelik. Die groei na geloofsvolwassenheid mag nooit onderskat of verwaarloos word nie. Iets wat nie groei nie, stagneer, gaan agteruit en sterf op die ou einde. Daarom beklemtoon hy: Soos ’n pasgebore baba smag na melk, moet julle smag na die suiwer geestelike melk, sodat julle kan opgroei. Die genade in Jesus, die kennis oor Jesus, gedrag soos Jesus en volgehoue betrokkenheid by Jesus, is die geestelike melk wat die gelowige sal help om te groei in die geloof, sterker te word in die vertroue en vrug vol liefde te dra.
Drink jy genoeg geestelike melk om in hierdie uitdagende tye suksesvol in die geloof te bly groei? Doen alles in jou vermoë om ook lentegroei in jou geloof te bring.
Ds Marius Kramer, Krugersdorp-Oos
