Psalm 18: 1-34

Dawid het Psalm 18 geskryf toe die Here hom uit die mag van Saul gered het, en hy gebruik taal wat uit sy hart kom. Hy skryf in die Psalm dat hy baie, baie lief vir die Here is en hoe hy God in sy lewe beleef. In digterlike taal beskryf Dawid God se krag en mag en sien hy hoe die Here se krag in sy lewensondervindinge aan die werk was. Wanneer hy terugkyk oor sy lewe, beskryf hy God as sy sterkte, rots, skuilplek, redder, skild en veilige vesting. Daar was tye toe die vyand wel te sterk was en waar Dawid op die rand van die dood was, met geen uitweg nie, maar wanneer hy deur die bril van God se genade en barmhartigheid kyk, sien hy dat God nooit ver was nie.

Die pad wat die Here met ons loop, is nie ’n pad waar God keer dat slegte dinge met ons gebeur nie, maar ’n pad waarop God ons beskerm wanneer slegte dinge met ons gebeur. Daarom kan ons soos die Psalmdigter in vers 30 sê: Met u hulp loop ek ’n oormag storm, met my God by my is geen stadsmuur vir my te hoog nie. Met God is dinge wat onmoontlik lyk, moontlik. Dawid sê dat wanneer hy besig is om van mense weg te hardloop en die berge in te vlug en op gevaarlike kranse te hardloop, God vir hom krag gee. God is by hom en hy is nie bang dat sy voete gaan gly nie. Hy sê in verse 33 tot 34 dat God hom met krag omgord: Hy maak my pad voorspoedig. Hy maak my voete soos dié van ’n ribbok; op hoë plekke laat Hy my stewig staan. Dit is in die krisisse in ons lewe dat ons besef dat ons soos die Psalmdigter na die Here kan roep en Hom om krag en genade kan smeek. Soos Hy dit vir die digter van Psalm 18 gedoen het, gee Hy self vir ons ook die uitkoms uit moeilike tye.

Dr Rudy Denton, Potchefstroom-Studente

af
af
Deel met behulp van
Copy link