Matteus 1: 22-24
Ek onthou hoe ons kind bang was vir die donker. Sy sou letterlik vries as die nag sy aankoms aankondig. Dan het sy haar pa se hand nodig om te beweeg. Sy wil in tyd van vrees en onsekerheid weet dat daar iemand by haar is. Dan het sy veilig gevoel en het rustigheid haar vel geword.
Met die aankondiging van Christus se geboorte, moet Hy ook Immanuel genoem word – dit beteken God by ons. God neem die gestalte van ’n mens aan om eintlik ook ons hand te kom neem. Hy wat God is, word in vlees gebore sodat die donker ons nie oorweldig nie. Hy kom aarde toe, sodat die bedoeling van die wet gesien kan word, naamlik wat liefde beteken.
Aan die einde van die jaar mag ons dalk onseker en bang voel oor die toekoms. Dit mag wees dat die vrees ons dalk laat vries en ons beweging tot stilstand wil bring. Hoor dan weer die woorde van Matteus 1: 23: “Die maagd sal swanger word en ’n Seun in die wêreld bring, en hulle sal Hom Immanuel noem.” Die naam beteken God by ons.
Christus is God by ons. Hy laat ons nie alleen nie. Ons hoef nie te vries vir die vreemde nie. Christus is deur sy Gees steeds elke dag in ons lewens teenwoordig. Hy is so naby aan ons soos ons vel. Ek kan veilig voel en rustigheid kan my oorweldig.
Die jaar 2025 is nie ’n monster wat wag nie. Die toekoms is in God se hande!
Ds Lammert van Rooyen, Lichtenburg-Oos
