Jesaja 8: 23 – 9: 6
Ons het in hierdie teksgedeelte te doen met ’n profesie oor ’n groot heilskoning van die toekoms. Soort van ’n vervulling van Natan se belofte aan Dawid dat daar weer ’n seun van Dawid op die troon sal sit. Wat Jesaja egter nie doen nie, is om te sê waar en wanneer hierdie koning in die toekoms gaan kom.
Jesaja gee die versekering aan die verdrukte volk dat die duisternis waarin hulle hulle onder die Assiriërs bevind, nie die laaste woord van God aan sy volk is nie. Aan die einde van hierdie donker tonnel sal God weer die lig laat skyn, sal Hy weer nuut met die volk begin. Hoe gaan Hy dit doen? Daar gaan ’n Seun gebore word, ’n Heilskoning wat ’n nuwe era in die geskiedenis van God en sy volk gaan inlei. Jesaja maak hier gebruik van ’n tipiese Assiriese troonbestyging waar daar vier titels aan die nuut gekroonde koning gekoppel word. Ons lees in Jesaja 9: 5 dat Hy genoem word: Wonderbare Raadsman, Magtige God, Ewige Vader en Vredevors.
Wonderbare Raadsman dui op Goddelike teenwoordigheid en werksaamheid. Magtige God kan ook vertaal word met Godheld, iemand wat nie net planne maak nie, maar dit deurvoer. Ewige Vader vir sy volk. Sover as wat jy kan terugkyk of vorentoe kyk, strek sy Vaderlike koningskap. Vredevors, in sy koninkryk is vrede nie maar net ’n groet nie, maar ’n konkrete werklikheid.
Jesaja sing hierdie Messiaanse loflied al het die duisternis nog nie eens werklik oor die volk gekom nie. Maar hy sing met geloofsmoed hierdie toekomslied omdat hy weet God sal die laaste woord hê. God sal sorg vir lig en heil, vir ’n koninkryk van vrede, reg en geregtigheid.
Hoewel hierdie teks nie noodwendig verwys na die koms van Jesus Christus nie, kan ons verstaan dat ons wat na die kruis leef, vir Jesus in hierdie woorde sien. Want Hy het gekom om as Wonderbare Raadsman, Magtige God, Ewige Vader en Vredevors vir ons die lig in die duisternis van die sonde te laat skyn. Hy het gekom om God se nuwe volk, ons, van die slawerny van die sonde te verlos.
Ds Willem Sauer, Waterberg
