Matteus 2: 2 en 6
Waar is die koning van die Jode? Dit is die deurlopende vraag in die Matteus-evangelie. Dit begin by die vraag van die wyse manne in Matteus 2: 2: Waar is Hy wat as koning van die Jode gebore is? En dan kom die antwoord: In Betlehem, een van die onbelangrikste dorpies. Johannes die Doper, wat sy koms moet aankondig, vra self later in Matteus 11: 3: Is U die Een wat sou kom, of moet ons ’n ander een verwag? En dan kom Jesus se antwoord dat as hulle Hom soek, moet hulle Hom by die blindes, die lammes, die melaatses, die weduwees, die randfigure, die verstote deel van die samelewing soek. Later, in Matteus 27: 11, vra Pilatus: Is jy die koning van die Jode? waarop God en die mense swyg. Dan lees ons dat daar tog ’n opskrif bokant sy doringkroon is waarop staan: Dit is Jesus, die koning van die Jode (Matt 27: 37).
Waar is Jesus wat gebore is met Kersfees, die Jesus aan wie ons ook hier in die Adventtyd dink? Matteus sê vir ons Hy is by die verstotenes, die regloses – half weggesteek tussen hulle op wie in alle samelewings neergesien word, wat nie regtig dieselfde regte het as ander nie. Wanneer ons lees dat Herodes en die skrifkenners nie weet wie Hy is en waar Hy vandaan kom nie, weet die randfigure baie goed wie Hy is.
Ons soek Hom in Kerstyd baie maal op die verkeerde plek. Ons soek Hom in die kerk met die oorbekende Kersliedere, onder die Kersboom of by die etenstafel. En so vra ons ook maar die vraag: Waar is Jesus dan? En dan kom die antwoord: by die siekes, die banges, die hongeres, die twyfelaars, die gebrokenes, die mense op wie ons ook maar alte dikwels neersien.
Want sien, hierdie Koning het nie gekom om gedien te word nie, maar om te dien. Hierdie Koning, Jesus Christus, ons Heer en Verlosser, het juis gekom om ons die versekering te gee dat Hy, in die woorde van Matteus 28: 20, by ons is tot aan die voleinding van die wêreld.
Ds Willem Sauer, Waterberg
