2 Timoteus 1: 1-18
In 2 Timoteus skryf Paulus aan Timoteus oor sy erfenis in die geloof. Paulus was in daardie stadium in die tronk in Rome in die middel van sy verhoor. Maar die verhoor het nie goed verloop nie en Paulus is oortuig daarvan dat hy binnekort gaan sterf. Vanuit hierdie situasie skryf Paulus die brief soos ’n testament waarin sy laaste woorde en geloofsbeginsels vervat is. Dit gaan hier oor Paulus se geestelike erfgoed wat hy aan Timoteus oordra.
Paulus dra sy geloofserfenis aan Timoteus oor deur terug te kyk oor sy eie lewe en bediening in diens van God. Paulus se bediening kan in party opsigte soos ’n mislukking lyk – daar was mense wat sy gesag bevraagteken het, valse leraars het sy verkondiging ondermyn, daar was voortdurend vrae en probleme by die gemeentes wat hy gestig het, en boonop het hy in die tronk beland omdat hy die evangelie van Jesus Christus verkondig het. Wanneer Paulus egter terugkyk op sy lewe as gelowige, fokus hy nie op die teleurstellings en swaarkry nie. Hy sien eerder die Here se teenwoordigheid raak. Daarom kan hy, selfs in die aangesig van die dood, vashou aan die belofte van lewe in Christus. Op grond hiervan, roep Paulus vir Timoteus op om sy roeping in diens van God te aanvaar. Timoteus het, soos Paulus, allerlei ontnugterings en teleurstellings beleef in sy bediening. Maar Paulus verseker hom dat die Here self waarborg dat Hy vir Timoteus in staat sal stel om getrou te bly aan sy roeping as verkondiger van die evangelie.
2 Timoteus 1 roep alle gelowiges op tot ’n vreeslose en skaamtelose verkondiging van die evangelie, ons geloofserfenis. Die evangelieboodskap het oor al die eeue heen dieselfde gebly. Oor geslagte heen is hierdie erfenis bewaar en oorgedra. Ons is maar ’n skakel in die ketting. Ook ons is geroep – soos Timoteus – om in ons leeftyd die getuienis van ons Here oor te dra. Mag die Here ons deur sy Gees inspireer om vas te hou aan die suiwer leer, sodat ons die kosbare pand wat aan ons toevertrou is, ons lewe lank kan bewaar.
Ds Marina Kok-Pretorius, Potchefstroom
