Psalm 23; Johannes 10: 1-21
Psalm 23 is seker die geliefste Psalm, die bekendste Psalm, die anker van baie gelowiges. Hierin vind ons troos, hoop en berusting. Hier word ons ingesluit in die kudde van God. Wanneer die Psalmdigter die prentjie skets van groen weivelde en waters waar rus is, wil ek my daar bevind. Veilig, versorg en beskerm deur die groot Herder.
Die metafoor van die Herder en kudde is alombekend oral in die Bybel. God en sy kinders. Elke gelowige is deel van God se kudde. Die kudde ken sy stem. God stel dit baie duidelik dat Hy vir ons lief is en vir ons omgee en ons wil versorg. God sonder nie sekere skape uit of gee vir hulle beter weiding nie. Almal is deel van hierdie één kudde. Hy sorg vir ons almal, elkeen is vir Hom besonders, uniek en spesiaal. Hy ken elkeen by die naam.
In die Evangelie volgens Johannes skryf die apostel die bekende Ek is-uitsprake van Jesus neer – onder andere in Johannes 10: 11: Ek is die goeie herder. Die goeie herder lê sy lewe af vir die skape. Hoe bevoorreg is ons as gelowiges – néé, medegelowiges – om deel te wees van Jesus se kudde! Ons is vir Hom so belangrik dat Hy sy lewe vir ons aflê. Dat Hy meer as een keer sê: Ek is die goeie herder. Hiermee bevestig Hy sy sorg en liefde vir elkeen wat in Hom glo en Hom ken.
Evangelieskrywers Lukas en Matteus deel met ons die gelykenis van die verlore skaap. Wanneer een afdwaal, los die herder die kudde agter en gaan soek na die een wat verlore geraak het. As hy by die huis kom, roep hy sy vriende en bure bymekaar en sê vir hulle: ‘Wees saam met my bly, want ek het my skaap wat weg was, weer gekry.’ (Luk 15: 6).
God pas sy kudde op. Dit is belangrik dat ons as medegelowiges ons plek in die kudde van God sal vind. Dat ons opnuut kan besef hoe kosbaar elkeen van ons is. Dat ons ook na mekaar moet omsien binne die kudde.
Ds Anneline Geyer, Kempton Park-Oos
