1 Samuel 10: 17-27 (AFR2020)
Al die mense van Israel is bymekaar waar Saul as koning aangewys word. Hulle kry hom egter nêrens nie. Hy kruip weg by die pakgoed (1 Sam 10: 22). Saul sien nie kans vir die groot taak en verantwoordelikheid nie.
Ons kruip ook soms weg, iewers by die pakgoed wat ons saamsleep deur die lewe. As gevolg van al die letsels weens jou seer, wys jy miskien vir die wêreld iets anders as wat jy regtig voel.
Kom ons kyk na ’n paar mense wat moontlik agter ongesonde gedrag wegkruip. Dalk herken jy hom of haar – dalk selfs in die spieël…
Daar is die knorpot: Niks stel hom of haar ooit tevrede nie. Hulle kla oor alles, is teleurgesteld in alles en almal, en hulle geniet dit om negatiewe kritiek te lewer.
Die aggressiewe een: Altyd humeurig – ’n drukkoker wat gedurig dreig om te ontplof.
Die boelie: Hulle maak dikwels seer omdat hulle seer het. Dis natuurlik ook ’n uiting van aggressie, al is dit soms meer subtiel in die vorm van afknou, kwets en ondergrawe.
Die skindertong: Hulle put plesier daaruit om lelike goed van ander te sê. Dit is nog ’n vorm van aggressie – passiewe aggressie. Wat steek hulle weg?
Die beterweter: Hulle is altyd reg en sal in elk geval nooit erken indien hulle verkeerd is nie.
En wat van die een wat jou altyd een voor wil wees? Wat hulle het (of gedoen het), is altyd beter as wat jy het (of gedoen het). Ja, selfs hul pyne en skete is erger as joune, en hul probleme groter.
Maar eintlik gee almal hierbo se optrede hulle weg – wat hulle doen, ontbloot die onvrede in hul harte, onvrede wat sal bly so lank as wat die gewig van die bagasie bly druk en skaaf.
En soos Saul agtergekom het: Jy kan nie vir God wegkruip nie! En ook nie vir jouself nie… Kom uit agter die pakgoed. Daar is hoop. Daar is balsem vir die wonde. Hou op wegkruip – en lewe eerlik. Dit is bevrydend!
Dr Johan van Staden, Sionspoort
