Rigters 6: 33-40
Daar is ’n proteïen met die naam laminin wat die funksie vervul om goed bymekaar te hou. Vir sommige mense het hierdie selletjie ’n vae ooreenkoms met die vorm van ’n kruis. Vir hulle is dit ’n teken dat God waarlik bestaan omdat ons leer dat God die Een is wat alles bymekaar hou. Tog, wanneer ’n mens vir iemand wat nie ’n Christen is nie, vra hoe ’n laminin lyk, sal hulle dalk vir jou sê dat dit in sy tweedimensionele vorm t-agtig lyk en wanneer jy na ’n klomp saam kyk, dit soos ’n blom kan lyk. Wanneer jy in die natuur gaan kyk, sal jy baie vorms sien wat mense sal sê verband hou met nie-Christelike oortuigings. Byvoorbeeld, die DNS-heliks kan vir sommige soos ’n Jin-Jang-simbool lyk.
Daar is natuurlik niks fout daarmee om die wonder van God in die skepping raak te sien nie. God is tog oral rondom ons in die skepping, maar ons moet versigtig wees dat ons nie hierdie lukrake tekens gebruik as basis vir ons geloof nie. Dit sal dan vir enigiemand maklik wees om vir jou die teendeel uit te wys, en waar staan jou geloof dan?
Gideon het vir God gevra vir tekens, en God het die tekens vir hom gegee. Natuurlik kon God kwaad geword het en gevra het: Hoe durf jy? Ek sal iemand anders in jou plek aanstel! Maar selfs in die tyd van die rigters sien ons dat God geduldig met sy skepsels omgaan. Ons sien dat God verstaan dat die mens se begrip swak is en dat hulle Hom nodig het.
Somtyds is dit vir ons moeilik om net geloof te hê – daardie absolute vertroue in God. Dit is vir ons moeilik om absoluut seker te wees van die pad waarop God ons stuur. God weet dat ons sukkel. Ten spyte van ons kleingeloof, is God ons steeds genadig. Daarom kan ons glo dat God rondom ons is, selfs in die kleinste van tekens, soos in ’n laminin.
Ds Yvette Scholtz, Magaliesmoot
