Psalm 1: 3
Hy is soos ’n boom wat by waterstrome geplant is, wat op die regte tyd vrugte dra en waarvan die blare nie verdroog nie. Hy is voorspoedig in alles wat hy aanpak.
Die Psalmskrywer vergelyk iemand wat sy vreugde vind in die woord van die Here met ’n boom wat by waterstrome geplant is. Hier word die vergelyking gestel dat mense soos bome is. Die basiese vergelyking word al gemaak waar God bome skep wat vrug dra en mense skep wat vrugbaar is.
Kyk na die bome rondom jou en word stil rondom die gedagte dat ons as mense soos bome is. Hoe dink jy is mense soos bome? Die Psalmdigter sê dat iemand wat vreugde vind in die woord van die Here soos ’n boom is wat by waterstrome geplant is, wat vrug dra op die regte tyd.
Hoe dink jy lyk so ’n persoon? Ken jy iemand wat jou aan hierdie beeld laat dink, of kan jy dink aan ’n tyd in jou lewe toe jy gevoel het hierdie beeld is vir jou waar?
Hierdie beeld vat ons terug na die tuin van Eden en herinner ons aan die boom van die lewe, wat langs ’n rivier geplant is en vrug dra wat lewe gee. Op ’n subtiele manier vergelyk die Psalmskrywer die Woord van die Here met die boom van die lewe. Wanneer ons vreugde vind in die Here se woord, is dit asof ons toegang kry tot die boom van die lewe. En nie net toegang kry nie, maar asof ons self soos ’n boom van lewe word, wat vrug dra vir ander om van te eet.
Wat beteken dit vir jou om soos ’n boom te wees wat by waterstrome geplant is, wat vrug dra op die regte tyd?
Gebed
Here, Skepper van die aarde en alles daarin, van bome en mense wat vrug dra: Here, help ons om vreugde te vind in u woord, sodat ons geplant kan wees in lewende waters, sodat ons kan vrug dra wat vir ander lewe gee, tot eer van u Naam. Amen.
Ds Lisa-Mari Prinsloo, Centurion-Oos
