Genesis 1: 1-3; Lukas 2: 8-14
Min van ons hou van die donker. Donker beskryf dikwels hoe ons oor sekere ervarings in ons lewe voel. Wanneer ons nie meer die uitkoms of die verandering wat nodig is, kan sien of kan bedink nie, voel ons ons is in die donker. Dit voel of ons in ’n diep, donker put is, met geen teken van lig, uitkoms en hoop nie. Hierdie soort donker maak ons angstig, benoud en desperaat. Wanneer dinge vir ons meer word as wat ons kan hanteer, word ons uitsig donker.
Deur al die eeue heen was en is daar nog altyd by ons mense die vrees dat die donker die lig in ons en om ons sal oorweldig. Daarom begin ons Geloofsboek, die Boek wat ons vertel van God en hoe God teenwoordig is in die wêreld en lewe van mense, deur ons te vertel van die Lig. Ons het nodig om te weet waar die Lig vandaan kom, wie die Lig is, dat die Lig gekom het om by ons te bly, sodat ons kan vertrou, glo en lewe.
Hierdie Lig, God, is op ’n baie besonderse manier betrokke en teenwoordig by en besorg oor ons. Jesus is die Lig wat ons altyd in ons duisternis kom vind, God wat ons red, wat uitkoms gee, krag gee, wysheid, insig, wat mense se harte kan verander. Want die duisternis, ons grootste moedeloosheid, diepste vrees, grootste seer, word verlig waar Jesus in ons harte en lewens woon.
In Jesus kom ontmoet God ons, daar waar ons dalk oorval is deur angs en donkerte, bang is, moedeloos is, kwaad is, oorweldig is deur ’n diep seer en woede in ons. God kom bied in en deur Jesus herhaaldelik die lewe vir ons aan.
Waar ons môre 2024 as hoofstuk van ons lewe gaan afsluit, onthou ons hoe God by ons was, glo ons dat God in 2025 steeds by ons sal wees. Kom ons gaan leef na die voorbeeld van Jesus soos kinders van die Lig. Laat God se lig, liefde en vrede wat harte verander, oor ander skyn.
Dr Annelie Botha, Universiteit van Pretoria / Kempten
