Lukas 24: 49

Ons vind die dissipels baie bekommerd in hierdie gedeelte. Seker ook met reg, aangesien Jesus aankondig dat Hy nie meer by hulle gaan wees nie. Jesus praat oor hul vrese, met die belofte van die Heilige Gees.

Eenkeer het ’n gesin in ons gemeente geëmigreer na Switserland. Die ma was swanger met ’n tweeling, en haar man het reeds begin werk. Sy was bekommerd oor haar agtjarige dogtertjie. Die agentskap wat hul sake vir hulle gereël het, het haar die versekering gegee dat sy nie bekommerd hoef te wees nie. Maar wat as sy skool toe moet gaan? het die ma gevra. Nee wat, dit is nie ’n probleem nie, het die dame wat hulle gehelp het geantwoord. Ons reël ’n reflector-baadjie vir haar. ’n Reflector-baadjie? vra die ma onseker. Ja, in Switserland werk dit so: As iemand sien dat ’n kind met so ’n baadjie op die vervoerstelsel (die Trem) klim of na die skool toe stap, beteken dit die kind is sonder toesig en dat jy na die kind moet kyk asof dit jou eie kind is.

In Lukas 24 word die Heilige Gees op ’n soortgelyke wyse beskryf: dat die dissipels met die krag van die Heilige Gees toegerus sal word, aangetrek sal word. Die dissipels van Jesus ontvang die nabyheid van die Gees van die Here. Ons sal nooit alleen wees nie.

Wat is die belofte hier? Die Here sê: Ek sal in Persoon by jou wees. Nie net sal Ek by jou wees nie, maar die Doop dien as ’n reflector-baadjie om jou te herinner dat jy nooit alleen sal wees nie. Daar sal altyd ’n geloofsgemeenskap wees om jou by te staan en, nog meer, ’n fisiese Persoon in die Heilige Gees.

Wanneer die onsekerheid van die wêreld of die bekommernis oor eensaamheid ons soms oorweldig, kan ons vashou aan die idee dat die Gees van die Here ons omvou met sy teenwoordigheid. Luister weer na hierdie belofte van Jesus: En Ek sal die gawe wat my Vader beloof het, vir julle stuur.

Dr Hein Delport, Swartkop

Share via
Copy link
Powered by Social Snap