Psalm 72
In ’n wêreld wat nie meer die Koning van Kersfees ken nie, in ’n wêreld waar die vrede wat Hy gebring het, nie elke dag gesien kan word nie, vra ook baie mense: Waar is Hy wat as Koning gebore is? En dan word ons herinner aan Psalm 72.
Ons werklikheid is dié van ’n wêreld vol onreg. Ons leef in ’n wêreld waar daar nie eintlik tyd is vir die randfigure, die minderhede, die mense in nood nie. En dan vra ons, waar is die Koning van Matteus se Evangelie, die koning van Psalm 72 dan? Is hierdie Messiaskoning maar net ’n vroom ideaal?
Psalm 72 sê vir ons wie hierdie koning is, die Koning wat heers met die grasie van God. Hy is die Een wat God se reg laat geskied, wat daar is vir hulle wat sonder hoop en sonder hulp is. Die interessante is dat hierdie koning van Psalm 72 dieselfde adres het as die Koning van die Matteus-evangelie: by die armes, die hulpeloses, by die heidene en sondaars.
Om Hom raak te sien in hierdie wêreld, moet jy Hom soek met die oog van ’n kind, ’n arme, ’n sieke, ’n verstoteling… Lees ons nie juis die treffende woorde in Matteus 5: 3 nie: Geseënd is dié wat weet hoe afhanklik hulle van God is… Want sien, sulke mense weet waar Jesus is en bewys aan Hom hulde.
Hoe bewys jy aan Jesus hulde? Deur plegtig in die kerk te sit en in Kerstyd deur die Kersfeesrituele te gaan? Of deur in totale afhanklikheid van Hom te leef? Dit gebeur eers as ons, soos Paulus in 2 Korintiërs 12: 9, van die Here hoor: My genade is vir jou genoeg. My krag kom juis tot volle werking wanneer jy swak is. En wanneer hy dit hoor, bely hy: Daarom sal ek baie liewer oor my swakhede roem, sodat die krag van Christus my beskutting kan wees.
Waar vind jy die Koning hierdie Kerstyd? Daar waar jy die afhanklikste van Hom is.
Ds Willem Sauer, Waterberg
