Johannes 1: 35-42
In die wêreld waarin ons leef, volg mense mekaar op Facebook of Twitter of Instagram, en op WhatsApp kyk ons na mekaar se profielfoto’s. Op dié manier sien ons iets van ’n ander se lewe, wat hulle dink, wat hulle glo of nie glo nie, sonder dat ons hulle regtig ken of ’n persoonlike verhouding met hulle het. So gebeur dit dat iemand wat ons nog nooit ontmoet het nie en nie regtig ken nie, hoe ons dink oor die lewe en sekere sake kan beïnvloed. Dit waaraan ons ons blootstel elke dag, het ’n invloed op ons.
Dit laat my wonder: Wie of wat gaan ons toelaat om ons lewe in 2025 te beïnvloed? Wie se navolgers (followers) gaan ons wees?
In die Nuwe Testament is om iemand se volgeling te wees baie anders as wat ons doen wanneer ons in vandag se tyd ’n bekende persoon volg of aansluit by die een of ander groep of beweging. Wat is anders? In die Nuwe Testament beteken om iemand se volgeling te wees dat jy daardie persoon persoonlik ken. Die twee volgelinge van Johannes wat besluit om Jesus te volg, wou weet waar Jesus tuisgaan. Waarop Jesus antwoord: Kom saam, dan sal julle sien. Hulle het saam met Jesus gegaan en die hele dag by Hom gebly. Hulle het Jesus leer ken.
Jesus roep ons elkeen ook so, en nooi ons uit: Kom saam, volg My. Ons word geroep om in Jesus se teenwoordigheid te leef. Deur die Heilige Gees leer ons Jesus ken, leer ons om as Jesus se volgelinge God se liefde teenoor ander uit te leef.
Kom ons hoor so aan die einde van 2024 Jesus wat ons uitnooi: Kom saam, dan sal julle sien. Kom ons besluit om elke dag van 2025 langer in gebed, in ons gedagtes en harte by Jesus te bly, sodat ons in die nuwe jaar wat voorlê, ander na Jesus kan bring.
Dr Annelie Botha, Universteit van Pretoria / Kempten
