1 Korintiërs 12: 12-31
Die hart van die evangelie lê daarin opgesluit dat Jesus die weg na ewige lewe is. As ons berou het en glo, sal ons die opdragte van God navolg. Volgens Matteus 22: 37-39 is die grootste gebod: Ons moet die Here ons God liefhê met ons hele hart en verstand en siel, maar ook ons naaste soos onsself. As ons iemand anders lief kan hê soos onsself, is dit ’n verbintenis, ’n eenword met die Liggaam van Christus.
Jy kan die tien gebooie perfek elke dag van jou lewe beoefen, maar as hierdie groot Gebod van God se liefde, ten eerste vir Hom en ook vir jou naaste, nie in jou lewe is nie, dan help dit niks jy onderhou die tien gebooie nie. Draai ons die prentjie om, dat jy wel die Here liefhet met jou hele hart, siel en verstand, jou naaste soos jouself, dan is die uitvoering van die tien gebooie van nature in jou lewe.
Daarom dat ons as navolgers van Christus mekaar ook so moet liefhê dat alles wat ons doen tot eer en verheerliking van God mag wees. Dat ons as lede van dieselfde Liggaam kan funksioneer tot sy eer. Medegelowiges dra mekaar se laste, en deel in mekaar se vreugdes.
Paulus skryf juis: Die oog kan nie vir die hand sê: “Ek het jou nie nodig nie.” Die kop kan weer nie vir die voete sê: “Ek het julle nie nodig nie.” Inteendeel, die lede van die liggaam wat as die swakste voorkom, is juis noodsaaklik, en dié wat vir ons minder mooi lyk, klee ons met groter sorg. … Julle is die liggaam van Christus, en afsonderlik is elkeen ’n lid daarvan (1 Kor 12: 21-23, 27). Daar mag geen onderskeid in die Liggaam wees nie. Alle lede is gelyk en moet omsien na mekaar.
Jesus Christus, as hoof van die Liggaam, hou die lede bymekaar. Wanneer ons as ’n eenheid funksioneer, en mekaar se belange op die hart dra, sal die Liggaam gesond bly. Dan het ons saam met Christus die toegang tot die ewigheid. Afsonderlik benadeeel ons die Liggaam, want dan gaan dit nie oor die Liggaam nie, maar oor die een lid wat net op homself wil fokus. Saam is ons beter tot eer van God. Ons het mekaar inderdaad nodig as medegelowiges. Elkeen het sy eie genadegawes ontvang, laat ons dit tot sy eer gebruik.
Ds Anneline Geyer, Kempton Park-Oos
