Markus 10: 35-45
Hierdie stukkie geskiedenis wat Markus met ons deel, klink so eie aan ons tyd. Almal soek altyd die beste vir hulself. Almal wil eerste wees, almal wil vinnig die boonste sport van die leer van sukses en erkenning bereik. Soms tot nadeel van die mense wat die naaste aan ons is. Ons vertrap mekaar, misbruik ons mag en gesag, net om eerste bo uit te kom. Ons laat nie die son skyn oor enige iemand as dit ons begeerte is om altyd eerste te wees nie, of as ons die ereplek wil hê nie.
As die ander dissipels hoor hoe voorbarig Jakobus en Johannes is, deur vir Jesus te vra dat wanneer Hy koning is hulle langs Hom kan sit, is hulle verontwaardig. Hoe durf die twee dit vra? Jesus roep almal nader en maan hulle om nie so te wees nie. Hy verduidelik dat baie nasies se leiers en regeerders baas speel en hul mag misbruik. Jesus spreek hulle direk aan in Markus 10: 43: Maar by julle moet dit nie so wees nie. Verder sê Hy elkeen wat binne die kring van dissipels wil groot word, moet ’n dienaar wees.
Ja, ek en jy ook. Jesus roep ons na sy binnekring as medegelowiges en leer ons om mekaar te dien. Dikwels wil ons net bedien word. Selfs in die kerk het ons soms die gesindheid dat die kerk ons moet bedien. God wil hê sy kerk moet ’n plek wees waar ons diensbaar is. Dat ons mekaar se behoeftes sal raaksien. Die karakter van die gemeenskap van gelowiges moet wees dié van diensbaarheid. Dat ons mekaar se voete sal was. Ons moet bereid wees om terug te staan sodat ander eerste mag wees.
Weer eens is Jesus vir ons hierin die voorbeeld. Hy het nie na die aarde gekom om bedien te word nie, maar om te dien. Hy het sy lewe gegee, as losprys. Doen vandag selfondersoek, en kyk rondom jou wie jy vandag kan bedien.
Here, ek wil vandag ’n glimlag op u gesig sit. Gee vir my hande wat help waar ek kan, tot u eer. Amen.
Ds Anneline Geyer, Kempton Park-Oos
