Psalm 124: 1-8
In ons geloofsvlug ervaar ons iets soortgelyk aan wat Psalm 124 verwoord, naamlik heroriëntasie. Die digter kyk naamlik na ’n veelbewoë stuk geskiedenis van Israel en verklaar: As die Here ons nie gehelp het nie… Wat die presiese aard van die bedreiging was toe Israel aangeval is, weet ons nie. Dit word met behulp van twee veelseggende beelde beskryf: ’n watermassa wat Israel wou verswelg, en ’n voëltjie wat in die wip van ’n voëlvanger gevang is.
Die Psalm verwoord ervarings wat gelowiges deur die eeue heen gehad het. lndividue beleef dit dat hulle deur verskillende fases van geloofsontwikkeling gelei word, dat hulle vanuit ’n naïewe geloof deur krisisse heen tot ’n dieper, volwasse geloof gebring word. Dit is dan dat dit belangrik word om uit die ervaringe van gelowiges deur die eeue heen te weet: God sal ons bokant die stormwolke uitbring; Hy sal ons uit die watermassa uithaal; Hy sal ons bevry uit die wip waarin ons vasgevang sit, sodat ons weer ons vlerke hoog kan sprei.
En hierdie proses wat in Psalm 124 beskrywe word, hierdie heroriëntasie in die geloof, is nie ’n eenmalige proses nie. Dit gebeur herhaaldelik in die lewens van gelowiges. Dit is alles deel van die “geloofsgimnastiek”, van die inoefening van die geloof volgens die skrywer van die Hebreër-brief.
Dan weet ons ook natuurlik verder, die siklusse van geloofsvorming waarin ons almal is, herhaal nou wel regdeur ons lewe, maar is nie ewigdurend nie. Eenmaal sal die finale heroriëntasie plaasvind. Alles sal herskep word. Die God wat hemel en aarde gemaak het en in sy trou nooit die werke van sy hande laat vaar nie, sal ook die nuwe hemel en aarde laat aanbreek. Die waarborg daarvoor is Jesus Christus self. Hy het Homself uit die hemelse orde en heerlikheid in die wanorde van ons wêreld gestort om die finale herskepping te bewerk.
Gebed
Here, dankie dat ek my na elke geloofskrisis of terugslag deur u krag telkens kan heroriënteer in die geloof. Amen.
Dr Gerhard Nel, Horison Roodepoort
