Eksodus 40: 34-38
In hierdie verhaal sien ons dat die Here graag tussen sy mense wou kom bly. Toe hulle die tabernakel klaar gebou het, het die Here dadelik ingetrek. Dadelik het Hy sy teenwoordigheid sigbaar gemaak in die vorm van ’n wolkkolom bedags en ’n vuurkolom snags. Dis interessant om te sien hoe die Israeliete se bewegings beïnvloed is deur God se teenwoordigheid. Hulle sou nie sonder God getrek het nie. Jy sou nie vir ’n paar dae sommer net in die woestyn ingetrek het sonder die Here nie, want later kom jy terug en dan is die Here en die hele kamp dalk weg. Jy het elke dag gekyk waar die Here is en jou dag dan aangepas by God se teenwoordigheid.
Dis hoe ons ook moet leef vandag, naby aan die Here. Elke dag moet ek seker maak dat ek in sy teenwoordigheid bly. As Hy gaan, dan gaan ek. As Hy bly, dan bly ek. Hoekom sal ek my lewe sonder God wil leef? Ek gaan vandag, en elke dag van nou af, die Here se teenwoordigheid dophou. Ek gaan kyk na daardie wolk- en vuurkolom en seker maak dat ek ook my roetine, my keuses en my gedrag aanpas by God se teenwoordigheid.
Gebed
As die lewenspad se bloedige son vandag op my neerbrand, is die Here se koelte soos genade vir my. As dit vannag yskoud raak in die woestyn, is dit lekker om nader te skuif na die hitte van God se teenwoordigheid. As dit donker raak, gee die Here vir my lig. As ek verdwaal, is God se teenwoordigheid my baken. Al is ek in ’n woestyn sonder paaie, sonder rigting, sonder tyd. Vandag onthou ek weer dat ek nie verlore nie is, want die Here se teenwoordigheid is ook mos ’n plek. Selfs al voel dit vandag of ek in die wildernis is, ek is nie verlore nie, want ek is by God. Amen.
Ds Pieter Rossouw, Mafeking/Zeerust
