Genesis 2: 9
Die Here God het verder allerlei bome, mooi om na te kyk en lekker om van te eet, uit die grond laat uitspruit, ook die boom van die lewe in die middel van die tuin, en die boom van alle kennis.
Hierdie is ’n verhaal van ’n boom, van mense en van ’n keuse. Die keuse om vir onsself te vat van iets wat mooi en lekker lyk, maar op die ou end verwoesting en dood in die wêreld inbring, of om God te vertrou om vir ons op die regte tyd te gee wat ons nodig het.
Die keuse van Adam en Eva is ons elkeen se keuse. Verskillende verhale in die Bybel gryp terug na hierdie verhaal, met soortgelyke keuses wat gemaak word. Dink aan verhale soos Abraham wat moet kies of hy sy eie pad gaan volg en of hy God gaan vertrou met die lewe van sy seun. Of dink aan Jesus se versoeking in die woestyn.
Ons word elke dag met soortgelyke keuses gekonfronteer, van allerlei dinge wat vir ons lewe belowe, maar wat eintlik destruktief is. Ons word ook die keuse gegee of ons God gaan vertrou en die boom van die lewe kies. Spreuke 3: 18 sê om met wysheid te lewe, is om die bron van lewe te kies.
Hierdie keuse is nie altyd maklik of voor die hand liggend nie. Jesus wys vir ons die pad na die lewe is die pad van die kruis. Wat vir ons soos die pad na die dood lyk, is vir God die pad na ware lewe. Mag ons vandag kies om God te vertrou om ons op die pad na die lewe te lei, eerder as om ons hand uit te steek en self te vat wat vir ons soos lewe lyk.
Gebed
Here, dit is so maklik vir ons om verkeerde keuses te maak. Vergewe ons wanneer ons self wil kies wat vir ons goed is. Help ons om op U te vertrou om ons te lei op die pad na ware lewe. Amen.
Ds Lisa-Mari Prinsloo, Centurion-Oos
