Genesis 46: 28-34
In hierdie gedeelte gebeur daar ’n wonderlike ding. Hier gebeur iets wat, menslik gesproke, nie moontlik was nie. ’n Pa en ’n seun ontmoet mekaar weer nadat die een gedink het die ander is reeds dood. Is dit nie ook maar ’n wonderwerk nie? Dis goed om partymaal weer te onthou dat alle wonderwerke nie groot en bo-natuurlik is nie. Wonderwerke het nie net gebeur met die skepping of toe Jesus die storm op die see stilgemaak het nie. Wonderwerke kan ook eenvoudig en alledaags wees, soos ’n pa en seun wat mekaar weer ontmoet.
Daar is dinge in die geloof wat ons nie op ons eie kan regkry nie: Om verdraagsaam te wees teenoor hulle wat anders is, om dié te vergewe wat teen my oortree het, om vrede na te streef. Hierdie dinge is nie altyd binne ons vermoë nie, dis ’n wonder wat die Here laat gebeur. Al voel dit of die lewe my platgeslaan het, die Here help my om weer op te staan. Al is alles so deurmekaar en voel dit of my lewe een groot gemors is, die Here kan my lewe herstel. Al is daardie reus te groot vir my, die Here kan my help om te oorwin. Al is ek in hierdie moeilike omstandighede en dit voel of ek nie ’n kans het nie, die Here kan my help om uit te styg. Al lyk hierdie verhouding stukkend, asof daar geen kans vir versoening is nie, die Here kan mense help om mekaar weer te ontmoet. Hierdie dinge lyk na klein en alledaagse goedjies, maar eintlik is dit wonderwerke wat die Here in ons lewens doen.
Gebed
Here, ons onthou dat U dit wat stukkend is, weer wil heelmaak. Wat leeg is, wil U vol maak. Wat leweloos is, wil U nuwe lewe gee. Ek wil vandag saam met U hierdie pad loop. Ek wil vandag deel wees van u koninkrykswerk. Ek wil deelkry aan die wonder wat U in my lewe wil doen. Amen.
Ds Pieter Rossouw, Mafeking/Zeerust
