Miga 4: 4
Elke man sal onder sy eie wingerd sit, ongesteurd onder sy vyeboom. Die Here die Almagtige het dit gesê.
Miga nooi ons uit om te droom oor hoe die wêreld kan lyk. Die eerste drie hoofstukke van Miga begin met ’n aanklag teen die nasies oor al die onreg en kwaad en geweld wat mense teen mekaar beplan, wat die wêreld besoedel. In hoofstuk 4 sien ons ’n draaipunt, ’n visie van wat God vir die wêreld droom. Daar sien ons dat mense nie meer geweld teenoor mekaar beplan nie, maar dat elkeen genoeg sal hê, dat elkeen ongesteurd onder sy eie wingerd of vyeboom sal sit. Dit skep ook die beeld van ’n wêreld waarin elkeen tevrede is.
Wanneer is jy tevrede? Wanneer het jy genoeg? As jy rondom jou kyk, dink jy ons lewe in ’n wêreld van tevrede en genoeg?
In vers 3 kry ons die visie dat swaarde en spiese verander word in ploeë en snoeiskêre – van iets wat lewe neem tot iets wat lewe help onderhou. Dit is duidelik dat hierdie visie van Miga nog nie ’n realiteit is nie. Ons sien daagliks jaloesie, onvergenoegdheid, oorloë en geweld. Maar Miga nooi ons uit om op ’n praktiese manier lewe te gee, eerder as om lewe te neem.
Hoe sal dit lyk as ons iets van hierdie visie in Suid-Afrika laat leef? As ons help om die praktyke wat lewe neem, wat ongelykheid en ontevredenheid skep, te verander in iets wat lewe gee, wat werk na ’n wêreld waar elkeen genoeg het?
Gebed
Here, ons sukkel met woorde soos tevrede en genoeg. Ons voel meer tuis met woorde soos meer of nog. Daarom kyk ons so graag na wat ander het en dink ons ons het nie genoeg nie, of dat ons gelukkig is om meer te hê as ander. Maar U, Here, droom van ’n wêreld waar elkeen genoeg het. Help ons om saam met U te droom en hierdie droom ’n realiteit te maak. Amen.
Ds Lisa-Mari Prinsloo, Centurion-Oos
