Hebreërs 11: 1-2
Ons verhoudings met medegelowiges word gekenmerk deur die liefde van Christus. Dit maak van ons ’n heilige gemeenskap. Die volgende artikel van die Apostoliese Geloofsbelydenis beklemtoon die besonderse band wat medegelowiges bymekaar bring binne die gemeente: Ek glo aan … die gemeenskap van die heiliges.
In die Nuwe Testament word gelowiges ook “heiliges” genoem, veral in die gemeentes van Korinte, Efese en Kolosse. Sommige van hierdie gelowiges was egter alles behalwe heilig in hul optrede; maar hulle was heilig omdat hulle deel was van die kerk as die liggaam van Christus.
Die Nuwe Testament verwys ook na ’n groot wolk getuies (Heb 12: 1, AFR2020) wat bestaan uit mense van geloof wat ons omring terwyl ons die pad van geloof stap. Trouens, elke gemeenskap binne die Christelike tradisie het sy “heiliges”, saam met die talle sendelinge en martelare wat weens hul dade deur die eeue heen deur Christene vereer word.
Mag elke gelowige deur hierdie geloofshelde geïnspireer word om deel te wees van die Bybelse oproep om heilig te leef in navolging van Christus, die Begin en Voleinder van die geloof (Heb 12: 2). God het ons aangeneem as sy kinders. Deur die Heilige Gees versterk Hy ons in ons geloof sodat ons as heiliges getuies kan wees van sy liefde en vergifnis. Sodat ons seker kan wees van die dinge wat ons hoop en oortuig kan wees van die dinge wat ons nie sien nie.
Ds Frikkie van Wyk, Montana-Oos
