Lukas 7: 18-23
Is U die Een wat sou kom, of moet ons ’n ander een verwag? Watter tipe vraag is dit wat Johannes die Doper hier vra? Hoe kan Johannes, wat gestuur is om die Verlosser se koms aan te kondig, twyfel of Jesus die regte Messias is? Dit maak nie sin nie. Hoe kan só ’n diepgelowige twyfel in die Here wat hy verkondig? Maar Johannes is nie die eerste of selfs die enigste persoon wat getwyfel het in Jesus nie. Christene en kerkmense regdeur die eeue het ook by tye getwyfel in Jesus – ons twyfel self ook soms oor geloofsake. En die groot rede hiervoor is omdat gelowiges soos Johannes en ons verkeerde of misplaaste verwagtings aangaande Jesus het.
Ons word in Kerstyd weer met ons twyfelvrae gekonfronteer. Kersfees is mos die tyd van gesinsvreugde, liefde, oorvloed en vrede. Maar soms word al hierdie mooi waardes deur ons omstandighede en ons omgewing bevraagteken. Soos wanneer daar onrus of twis is onder familielede of ongelukkigheid oor die werk wat jou nie wil tyd afgee op Kersdag nie, of dalk is jy die slagoffer van misdaad wat met Kerstyd verband hou. Mense is steeds ongeduldig en ongeskik op paaie en in die winkels en by die huis. So kan die lys aangaan. Al hierdie dinge laat ons vra of die Kersevangelie die verskil gebring het waarop ons gehoop het? Of het ons ons dalk misgis?
Johannes het verwag dat die Messias kom om die goddelose te vernietig, maar toe kom die Messias om te dien en te genees. Die koninkryk van God kom anders as wat ons as mense sou wou hê, want dit kom nie deur magsvertoon en geweld nie, maar langs die pad van God se liefde en diens. Jesus bring ’n uitnodiging vol liefde en deernis. ’n Uitnodiging tot saligheid, tot geluk, nie wraak of oordeel nie. Ons kan ons vertorue op Christus stel. Al verstaan ons nie alles nie, al kry ons swaar, al sterf Johannes in die gevangenis, kan ons weet en daarby berus dat Jesus ons vryspreek. Dat Jesus Immanuel is – God met ons.
Ds Waldo Pretorius, Ventersdorp
