Markus 1: 16-20 (AFR2020)
’n Prentjie sê soms meer as ’n duisend woorde. Ons gebruik daagliks simbole en beelde om te kommunikeer. Dink aan padtekens, advertensies en emoji’s wat deur prentjies en simbole boodskappe oordra. Christene het Bybelse simbole wat oor die jare ontwikkel het, soos die herder, die kudde, die anker, brood, sleutels, ensovoorts. Die volgende paar dae gaan ons nadink oor simbole in die Bybel.
Die vis is die heel oudste simbool onder Christene. Vroeë Christene is vervolg vanweë hul geloof. Deur geheime kommunikasie het hulle hul geloofsoortuiging gedeel. Een manier was om met die toon in die grond ’n vissie te teken. So het die ander persoon, as hy of sy ’n Christen was, die visprentjie se betekenis verstaan. Jesus se dissipels was vissers, maar Hy het hulle vissers van mense gemaak, soos ons in Markus 1: 17 lees: Volg My, en Ek sal julle vissers van mense laat word.
In kunswerke met Christelike betekenis word vis en brood dikwels saam uitgebeeld. Ons dink hier ook aan die seuntjie met sy vissies en broodjies, en die wonder van die kosvermeerdering.
Die Griekse woord vir vis is ICHTHUS, wat ook ’n akroniem vir Christene was, met die Griekse betekenis Iesus Christos Theou Uios Soter of in Afrikaans vertaal Jesus Christus is die Seun van God en Hy is die Redder.
Ons kan deesdae vreesloos ons geloof bely. Jy hoef nie versigtig met jou toon ’n vissie te teken nie. Talle mense het visprentjies op hul buffers. Daardeur deel hulle met trots dat hulle navolgers van Jesus Christus is. Kom ons leef die kentekens. As jy op jou motor se buffer ’n vissie het, laat jou bestuursgedrag dan iets van jou Christenskap vertoon.
Ds Louw van der Linde, Evander
