Efesiërs 3: 14-19
Jy sal sekerlik met my saamstem dat goeie verhoudings met ander mense van kritieke belang is vir elkeen van ons. Is dit dan nie juis deur verhoudings met ander dat jy as mens jou vervulling in die lewe die beste beleef nie? Aan die ander kant is dit een van die slegste dinge in die lewe om eensaam te wees. Natuurlik is daar mense wat dit beter regkry as ander om alleen reg te kom, maar selfs sulke mense het van tyd tot tyd behoefte aan die nabyheid van ander mense. Hierdie afhanklik wees van en betrokke wees by die lewens van ander mense is eweneens waar vir die geloofsgemeenskap waarvan jy as gelowige deel is. Waar kom dit vandaan en wat beteken dit?
Die bron is gemeenskap met God. Wanneer Paulus vir die gelowiges in Efese bid, sê hy: Daarom kniel ek in gebed voor die Vader aan wie die hele gemeenskap van gelowiges in die hemel en op die aarde sy bestaan te danke het. Ek bid dat Hy deur sy Gees uit die rykdom van sy heerlikheid aan julle die krag sal gee om innerlik sterk te word, dat Christus deur die geloof in julle harte sal woon en dat julle in die liefde gewortel en gegrondves sal wees. Mag julle in staat wees om saam met al die gelowiges te begryp hoe wyd en ver en hoog en diep die liefde van Christus strek. Mag julle sy liefde ken, liefde wat ons verstand te bowe gaan, en mag julle heeltemal vervul word met die volheid van God.
Die belangrikste is om raak te sien dat die geloofsgemeenskap sy oorsprong van God die Vader self ontvang het. Dit is dus nie deur die besluit van mense of die een of ander kerklike organisasie dat gelowiges aan ’n bepaalde geloofsgemeenskap moet behoort nie. Dit is ook nie ’n geval van net die gelowige wat kies om deel van die geloofsgemeenskap te wees wat dan wel deel daarvan is nie. Dit is ook nie so dat jy deel word van die geloofsgemeenskap deur amptelike lidmaatskap van die een of ander kerk of gemeente te kry nie. Nee, Paulus stel dit duidelik dat God die Vader direk daarvoor verantwoordelik is dat jy deel van ’n geloofsgemeenskap vorm. Die manier hoe God jou deel van die geloofsgemeenskap maak, hou verband met sy verkiesende genade en die feit dat Hy deur die werking van sy Gees in jou hart die geloof geplant het sodat jy die verlossing wat deur Jesus Christus bewerk is, deelagtig kan word. Dit is waarom hierdie gedeelte gelowiges oproep om gesamentlik te ontdek wat die volle inhoud van God se liefde is. Trouens, die volle omvang van God se liefde kan net verstaan word as jy dit onderling in verhouding met ander gelowiges ontdek.
Ds Frikkie van Wyk, Montana-Oos
