Lukas 13: 18 (AFR2020)
Daarop het Hy gesê: “Waaraan is die koninkryk van God gelyk, en waarmee sal Ek dit vergelyk? Dit is soos ’n mosterdsaadjie wat iemand geneem en in sy tuin gesaai het. Dit het gegroei en ’n boom geword, en die voëls van die hemel het in sy takke kom nesmaak.”
Met watter koninkryke sou die koninkryk van God vandag vergelyk kon word? Hoe is God se koninkryk anders as vandag se koninkryke? Is ons as kerk meer soos die aardse koninkryke, of is ons ’n beeld van die koninkryk van God?
Wat die mosterdplant betref, is dit interessant om te sien dat die Joodse wette, die Midrash, verbied dat mosterd in ’n tuin geplant word, aangesien dit ’n gemengde saadtipe is. Om mosterd in jou tuin te plant, maak jou en jou gemeenskap onrein. Dit is ook beskou as ’n onkruid, omdat dit vinnig versprei en weer en weer opkom, al word die oorspronklike plant vernietig. ’n Mosterdplant is ook nie regtig ’n boom nie, maar nader aan ’n struik, met takke wat nie noodwendig sterk genoeg is vir voëls om in nes te maak nie. Maar Jesus sê spesifiek dat voëls in die boom kom nesmaak. Dit skep ’n tuiste vir voëls. Voëls was nie noodwendig positief geag nie, veral nie deur die Romeinse elite nie, aangesien voëls die oes van die omliggende gewasse vernietig het en dit beteken het dat Rome minder belasting uit die opbrengs van die oes kon eis.
God se koninkryk is anders as die koninkryke van die wêreld. Dit is ’n plek waar onrein en rein welkom is. Dit is iets wat nie uitgeroei of vernietig kan word nie, maar elke keer weer nuut opstaan. Dit is ’n koninkryk wat die sisteme of koninkryke wat mense onderdruk en uitbuit, stelselmatig afbreek.
Dit nooi ons om te vra: Hoe kan ons ook mosterdsaadjies plant en hierdie koninkryk vandag sigbaar maak?
Gebed
Here, laat u koninkryk kom, soos in die hemel, so ook op die aarde. Soos mosterdsaad wat in ’n tuin geplant word, mag U ons en ons wêreld transformeer om ’n plek te wees waar mense ’n tuiste vind en waar elkeen genoeg het. Amen.
Ds Lisa-Mari Prinsloo, Centurion-Oos
