Filippense 2: 1-2
Gelowiges word deur die teks opgeroep om onderlinge liefde teenoor mekaar uit te leef. Aangesien julle die troos in Christus ondervind het, die aansporing deur die liefde, die gemeenskap deur die Gees, die innige meegevoel en meelewing – maak dan nou my blydskap volkome deur eensgesind te wees: een in liefde, een van hart, een in strewe. Met hierdie opmerking bedoel Paulus dat die teken van jou geloofsverbintenis aan God (wat volgens 1 Joh 4 liefde is) sigbaar word in jou liefdesverbintenis met ander gelowiges.
In Efesiërs 4: 15-16 gee Paulus ’n verdere motivering hiervoor deur te sê: Hy is immers die hoof, en uit Hom groei die hele liggaam. Die verskillende liggaamsdele pas by mekaar en vorm saam ’n eenheid. Elkeen van hulle vervul sy funksie, en so bou die liggaam homself op in liefde. Daarmee word twee belangrike eienskappe beklemtoon: Aan die een kant is die geloofsgemeenskap ’n eenheid soos die mens se liggaam. Deur geloof in Christus is ons ook aan mekaar verbind soos wat elke liggaamsdeel op verskillende maniere aan mekaar verbind is. Al is die liggaam ’n eenheid, bestaan dit ook uit ’n verskeidenheid van ledemate. Die verskeidenheid is juis belangrik vir die korrekte funksionering van die liggaam as geheel. In die mate waarop elke liggaamsdeel korrek funksioneer, baat die liggaam as geheel ook daarby en kan die liggaam wees en doen wat van hom verwag word.
So gaan dit ook met die geloofsgemeenskap waarvan ek en jy deel is. Die gemeente (geloofsgemeenskap) groei en funksioneer al hoe beter wanneer elke gelowige wat deel vorm van die gemeente, hul diens lewer in en deur onderlinge liefde. Deur deel te vorm van die geloofsgemeenskap en gehoorsaam aan die Here jou diens te lewer, is dus nie ’n vrye keuse nie, maar deel van die wesensaard van kerkwees. Jy het ander mense nodig en hulle het jou nodig sodat almal saam in geloof kan groei en God al meer deur die geloofsgemeenskap verheerlik kan word.
Ds Frikkie van Wyk, Montana-Oos
