Hebreërs 10: 23-25
Baie mense wat in Jesus glo, het hulself uit die kerk ontruim, ja, opgehou om deel van ’n kerk te wees. Die kerk is nie noodwendig meer die tradisionele klipgebou op die hoek nie. Die kerk kan ewe maklik ’n handjievol gelowiges wees wat saam in ’n kafee vergader. Maar baie van God se mense doen nie eens dit nie.
’n Engelse kollega vertel hoe stiptelik hul gemeente wetgewing oor beroepsgesondheid en -veiligheid implementeer. Hulle het ’n groot, moderne kerkkompleks. Oral in die gebou is daar deursigtige plastieksakkies met die gemeente se ontruimingsplan en versamelpunte daarin. Tot sy eie skande vertel die kollega hoe ’n lidmaat hom met die ontruimingsplan in ’n lokval gelei het. Die lidmaat maak so ewe droog ’n opmerking oor die netjiese ontruimingsplan, en toe die kollega dankbaar en tevrede reageer, sê die lidmaat hy is so dankbaar dat hulle as lidmate vir die kerkraad so belangrik is – hulle verskaf selfs ontruimingsplanne vir indien die preke te lank en vervelig raak!
Na alles, beskou mense godsdiens dikwels as op ’n manier vervelig. Ek bedoel, wie wil op ’n Sondag van alle dae opstaan, op ’n harde bank gaan sit en luister na iemand wat vir ’n halfuur of langer aanhou? Hier is wat “kerk” egter bedoel is om te wees, volgens Hebreërs 10: 24 en 25: Laat ons voortdurend aandag gee aan mekaar – oor hoe ons mekaar kan aanspoor tot liefde en goeie dade. En laat ons tog nie, soos party gemeentelede die gewoonte het, versuim om die gemeentebyeenkomste by te woon nie. Kom ons moedig mekaar aan, nog meer omdat ons sien dat die dag van Christus se koms al hoe nader kom.
Kerk is ’n plek waar ons mekaar kan aanspoor. Ek weet, ek weet … jou plaaslike kerk is dalk nie so perfek nie. Maar hier is wat dit kan wees: ’n plek waarheen jy kan gaan en ander mense in hul geloof aanspoor, ’n plek waar jy ’n ewige verskil in ander mense se lewens kan maak.
Ons mag nie, soos sommige doen, ophou om saam te vergader nie. Nee, ons moet aanhou om mekaar aan te moedig om tot eer van God te leef.
Ds Errol Sheppard, Rietspruit/Vanderbijlpark
