Openbaring 22: 2
Tussen die hoofstraat van die stad aan die een kant en die rivier aan die ander kant staan die boom van die lewe. Hy dra twaalf keer per jaar vrugte: elke maand lewer hy sy vrugte. Die blare van die boom bring genesing vir die nasies.
Openbaring word dikwels as ’n toekomsvoorspelling gelees, maar Openbaring is amper soos om die gordyne van ’n teater weg te trek en agter die skerms te kyk. Dit is nie bedoel vir eendag nie, maar bedoel om nou vir ons hoop te gee dat God besig is om alles nuut te maak en dat ons, deur Christus, toegang tot ware lewe het.
Wat interessant is om te sien, hier aan die einde van Openbaring, is dat die boom van die lewe nie net vir die mense in die nuwe stad bedoel is nie, maar dat die boom genesing bring vir die nasies.
Ons kan maklik dink dat God net oor Christene omgee en ons wil verwyder van die res van die wêreld. Maar God wou nog altyd die wêreld red, herstel bring vir die nasies, nie net vir die mense binne die stad nie.
Behoort die kerk net om te gee vir dié wat reeds deel is van die kerk? Of behoort die kerk juis die genesende krag van Christus na die nasies toe te vat, sodat hulle ook genesing kan beleef? Dit is interessant om te sien dat die nuwe stad in Openbaring twaalf poorte het, maar geen deure nie, juis om te sê dat enigiemand welkom is in God se teenwoordigheid. Hoe sal dit lyk as ons hierdie visie vandag in die kerk laat leef?
Gebed
Here, help ons om ook ’n plek te wees waar ander genesing kan kry en waar ons kan help om ’n gebroke wêreld te genees. Amen.
Ds Lisa-Mari Prinsloo, Centurion-Oos
