1 Korintiërs 12: 12-26
Die tyd waarin ons leef, word sterk gekenmerk deur die verskynsel dat die individu baie vryheid ontvang. Elke mens eien sigself dikwels die reg toe om te fokus op eie belange. Alles moet gebeur volgens die individu se smaak. Hierdie houding word ook in ons kerklike lewe ingedra, sodat kerklike meelewing ook aan hierdie maatstaf gemeet word. Dit lei meermale daartoe dat mense al minder lus het om amptelik lidmaat van ’n kerk of gemeente te word. Ook die belewenis van die gelowige se verhouding met die Here word ’n persoonlike saak waaroor elkeen vir hulself kan besluit.
Die belangrike vraag is dus: Wat maak jou betrokkenheid by ’n kerk of gemeente formeel? Is amptelike lidmaatskap die motivering sodat jy om daardie rede iewers “aansluit”? Of is daar iets anders?
Amptelike kerklike lidmaatskap kan nie die motiverende faktor vir betrokkenheid by ’n gemeente wees nie. Jy is dus nie betrokke by ’n gemeente omdat jy nou eenmaal daar ’n lidmaat is wie se besonderhede in ’n register opgeskryf is nie. Dit gaan ook nie om die voordele wat jy as lidmaat kan ontvang omdat jy lidmaat is nie. As dit die rede vir jou betrokkenheid is, is jou fokus op jouself gerig en selfsugtig.
Dit is belangrik om raak te sien dat die motivering vir kerklike of gemeentelike betrokkenheid voortvloei uit die feit dat jy saam met ander gelowiges aan God gebind is en daarom saam met hulle dieselfde stel kernwaardes tot eer van God najaag. Die fokus val nie op elkeen se eie belang nie, maar op die verheerliking van God en die opbou van die liggaam van Christus, deur elkeen se diensbaarheid aan mekaar en aan God. Die kerk is ’n gemeenskap wat onderling aan mekaar verantwoording verskuldig is.
In 1 Korintiërs 12 spel Paulus dit mooi uit as hy in vers 26 sê: As een lid ly, ly al die lede saam; en as een lid geëer word, is al die lede saam bly. Die gelowiges het die verantwoordelikheid om mekaar te hou aan die kernwaardes wat gesamentlik nagestreef word. Dit gaan immers om die eer van die gemeente se God wat op die spel is. Die kerk is gemeenskap en nie byeenkoms nie. Kerkwees gaan om meer as erediens. Dit gaan eerder om ’n gemeenskaplike lewenstyl vanuit die erediens.
Ds Frikkie van Wyk, Montana-Oos
