Psalm 143: 10

Hoeveel keer het jy al by ’n kruispad in die lewe gekom en gewonder waarheen nou? Of hoeveel keer was jy al in ’n situasie en het jy gewonder wat die regte ding is om te doen? Ons het sekerlik almal al soos die Psalmdigter van Psalm 143:10 vir God gevra: Leer my om u wil te doen, want U is my God! Laat u goeie Gees my op ’n gelyk pad lei.

Dit is een van die voorregte van om ’n kind van God te wees. Om deur God self geleer te word. Nie deur ’n leermeester of ’n aanlyn kursus nie, maar deur God self. Hy wil ons leer, Hy wil ons op die regte pad lei, want God weet waarmee Hy in elkeen van ons se lewe besig is. Hy weet wat Hy vir ons beplan het. Daarom het Hy die Heilige Gees gestuur om ons te help.

Dit is God se geskenk aan ons – ons is nooit alleen nie. Ons hoef nie alleen deur moeilike tye te gaan of hartseer op ons eie te verwerk nie. Ons hoef nie in ’n konfliksituasie bang te wees nie, ook nie wanneer dit met ons moeilik of swaar gaan nie, want ons is nooit alleen nie.

Ons weet tog al hierdie dinge, maar vergeet dit soms en moet voortdurend daaraan herinner word. Wanneer daar weer ’n kruispad is of wanneer hartseer jou oorweldig of konflik jou bang maak, weet dat jy altyd Iemand aan jou sy het. Iemand wat jou daardeur sal help en lei.

Gebed

Here ons God, soms voel ons alleen. Mense verstaan nie ons swaarkry of hartseer nie. Vandag herinner U ons dat U altyd daar is. Leer ons, Heer, om u wil te doen, want U is my God! Laat u Gees ons op ’n gelykpad lei. Ons vra dit so onverdiend, maar alleen uit genade. Amen.

Ds Marissa Kidson, Pretoria-Wes

Share via
Copy link
Powered by Social Snap