Handelinge 24: 24-27
Paulus is nou al vir twee jaar in die gevangenis. Die goewerneur wat sy saak moes aanhoor, was korrup. Daarom word Paulus se tyd in die gevangenis verleng, nie omdat hy ’n misdaad gepleeg het nie, maar omdat Feliks gehoop het dat Paulus hom sou probeer omkoop. Paulus het nie vir Feliks enige omkoopgeld aangebied nie. Inteendeel, Paulus het elke geleentheid gebruik om met Feliks te praat oor ’n goeie lewe voor God. Ons kan ons net indink hoe magteloos en gefrustreerd Paulus moes gevoel het. Daar is soveel goeie werk wat hy nou kon doen, soveel plekke wat hy kon besoek om Jesus se Blye Nuus uit te dra. Maar nou sit hy hier in die gevangenis en sy hele bediening het tot stilstand gekom.
Baie van ons voel ook so, so asof my lewe tot stilstand gekom het. So asof ek ook vasgevang is. Die ironie is, ons leef in ’n tyd van ongekende voorspoed en welvaart. Alles gaan eintlik goed, maar ek is kwaad. Daar is nie regtig iets fout nie, maar ek is gefrustreerd. Ek het niks om oor te kla nie, maar ek is ongelukkig. Die uitdaging wat ons vandag het, is om in ’n tyd van oorvloed en gemak steeds dankbaar te wees. Om in ’n tyd van rykdom steeds waardering te hê, in ’n tyd van vervelige roetine steeds dryfkrag te hê. Om in ’n korrupte samelewing anders op te tree, in ’n tyd van verval steeds hoë standaarde na te streef en my bes te doen.
Al was Paulus in die gevangenis en al het sy bediening eintlik tot stilstand gekom, was hy nie minder ’n apostel van die Here nie. Al is daar baie frustrasies in my lewe, al voel dit of ek ook vasgevang is, al is die wêreld so deurmekaar, ek bly steeds ’n kind van die Here. Kom ek gaan leef vandag so.
Ds Pieter Rossouw, Mafeking/Zeerust
