Genesis 9: 8-17
Noag was getrou aan God. God het hom beveel om ’n ark te bou en so het Noag gemaak. Noag word bewaar deur die vloed – hy en sy gesin is veilig aan die einde van die vloed. Aan die einde van die vloed sluit God ’n verbond met Noag en die skepping. God beloof dat Hy altyd by sy volk sal wees en altyd hulp sal bied; Hy sal altyd betrokke bly by sy skepping.
Hierdie is maar een van vele verhale waar God ’n verbond met sy volk sluit. Getrouheid is die sleutelwoord met God se verbond. God bly altyd getrou aan sy verbond en sy verbond het ook nie ’n eindtydperk nie – dit is ’n ewige verbond. Op hierdie wyse kan ons met sekerheid getuig dat God op ’n konstante basis betrokke is by sy skepping en skepsels. Hy bewaar ons en bied altyd bystand wanneer ons met verskeie situasies in die lewe gekonfronteer word. Ons is nooit alleen nie; God se verbond oortuig ons hiervan.
Die kenmerkende verskynsel met Noag se verbondsverhaal is die reënboog. Die reënboog is ’n fisiese teken van God se verbondsbelofte. Só word ons gereeld herinner aan God se belofte wanneer ons ’n reënboog aanskou. Die reënboog is ’n fisiese herinnering aan God se betrokkenheid. Die verbond dui verder aan dat ons in ’n verhouding met God staan. In hierdie verhouding is God altyd getrou. Maar gelowiges het die verantwoordelikheid om hul deel na te kom deur aan God gehoorsaam te wees – sodoende is ’n verbond tweeledig.
God se verbond is die wyse waarop Hy betrokke is in sy skepping. God se verbond bied die sekerheid en vrede dat Hy ook betrokke is in elke gelowige se lewe. Sy verbond verseker ons dat Hy ons nooit sal verlaat nie en aan ons die nodige krag bied vir ons omstandighede.
Mag God se verbond vir ons die vrede en sekerheid bied dat God konstant teenwoordig is in ons lewe. Ons word nooit alleen gelaat nie, God maak juis ’n belofte sodat ons dit altyd sal onthou.
Ds Hanri Reichel, Van Warmelo
