2 Johannes 1
’n Besliste realiteit van hierdie lewe is dat nie een van ons vir altyd hier sal wees nie. Vir elkeen van ons kom daar ’n dag dat ons moet afskeid neem van die aarde en alles en almal hier. Wat of wie sal jy daardie dag om jou bed wil hê? Sal jy die volgende sê? Bring al my grade en sertifikate, al die toekennings en eerbetoon wat ek in my lewe ontvang het. Of: Gaan trek al my geld uit my bankrekening en bring dit hier na my toe. Of: Vat my bed na die motorhuis toe sodat ek by my motors te wees. Of: Bring die goue horlosie wat die werk vir my gegee het en vat my terug na die plek toe waar ek gewerk het.
As jy ’n keuse het, glo ek sal jy eerder die mense wat jou liefhet – jou familie en vriende, jou broers en susters in die geloof – om jou bed wil hê. Dit is ’n groot leuen dat eer en aansien of geld en besittings of die werk wat ons doen, vir ons die belangrikste in ons lewe is. As jy die waarheid wil weet, gaan vra ’n persoon wat sterwend is. Die antwoord is liefde, mense se liefde, maar selfs nog belangriker, God se liefde. Ons hoef nooit daaroor te twyfel nie dat God vir ons lief is. As ons ooit sou vra Here, het U my lief?, sal ons Vader sê: Kyk na die kruis en antwoord self! As ons ons Hemelse Vader sou vra Here, hoe wil U hê moet ons vir U lewe?, is daar geen twyfel in my hart nie dat God ons sal antwoord: As julle vir My wil lewe, gaan lewe in ooreenstemming met die waarheid van die evangelie. Gaan lewe soos Ek bedoel het julle moet lewe. Gaan lewe in die liefde! Kom ons sê dankie vir ons Hemelse Vader deur die belangrikste te doen: die liefde te gaan lewe.
Gebed
Liefdevolle Vader, help my om lief te hê. Amen.
Ds Stephan Botha, Rustenburg-Suid
