Jesaja 2: 1-5
Hierdie gedig van Jesaja klink amper soos ’n dagdroom, en nie baie realisties nie. En tussen al die dinge wat vreemd in hierdie teks klink, lees ons boonop dat die nasies na die Here se huis sal stroom op ’n hoogte. Maar water kan mos nie opdraande vloei nie! Nou begin ons om vir Jesaja te hoor. Water vloei afdraande. Dis hoe die wêreld werk, maar die Here se werk pas nie altyd in by die manier hoe die wêreld werk nie. Om ’n kind van die Here te wees, vra soms van my om nie maar net te doen soos die wêreld dit wil hê nie, maar om anders op te tree. Amper soos water wat opdraande moet vloei.
Kom ons onthou vandag dat die gebrokenheid van die wêreld nie die enigste werklikheid is nie. Daar is ’n ander realiteit ook – die Here het ons só liefgehad dat Hy sy enigste Seun na die wêreld gestuur het om ons te red. Deur sy kruisdood en opstanding is vryspraak en lewe ook vir ons ’n werklikheid. Nou roep die Here ons om saam met Hom te werk, daardie water gaan nie vanself teen die hoogte op vloei nie! Kom ek streef na vrede daar waar onenigheid en rusie is. Kom ek maak tyd vir die Here daar waar ek nie elke dag genoeg tyd het om alles in te pas nie. Kom ek tree anders op daar waar mense nie eintlik God se wil nastreef nie. Kom ek wees ’n goeie dissipel van Jesus wat Hom help om God se koninkryk nader te bring.
Hierdie droom wat Jesaja beskryf, klink so ’n bietjie onrealisties. In ’n mate is dit so, want hierdie droom gaan nie vanself realiseer nie. Jesus het na ons toe gekom en vir ons kom wys hoe om dit te doen. Kom ons werk vandag saam met die Here om sy liefde en teenwoordigheid meer as net ’n dagdroom te maak. Kom ons werk vandag saam met die Here om dit ’n werklikheid te máák.
Ds Pieter Rossouw, Mafeking / Zeerust
