Lukas 4: 14-22
My medegelowige in Jesus Christus:
Op die Sabbatdag soos sy gewoonte was. ’n Goeie gewoonte. Daar gaan Jesus voort om verder te verkondig dat dit Hy is waarin die Woord van God, soos in die Ou Testament voorspel is, besig is om in vervulling te gaan.
Om die evangelie aan armes te verkondig. Hulle wat bewus is van hul onvermoë en armoede om ten volle, soos God wil, te leef. Hulle sal nie met wat hulle het, vryspraak kan verkry nie.
Vrylating vir gevangenes. Dié wat vasgeknel is deur gebooie van mense wat aan hulle voorgehou word as die weg tot saligheid.
Herstel van gesig vir blindes. Om geestelike blindheid te genees sodat die genade van God, soos van vroeg af aangekondig en gesien kan word. Om te kan sien en te kan verstaan wat God al byvoorbeeld aan die begin van die tien gebooie sê: Ek is die Here jou God wat jou uit Egipte, die plek van slawerny bevry het. Om te verstaan wat die woorde van Abraham aan Isak beteken: God sal sy eie Offerlam voorsien.
Om onderdruktes in vryheid uit te stuur. Onderdruk deur die dwaalleer van die Fariseërs, maar nou nie meer onder die wet nie. Nou deur genade: Kom na My toe! My juk is sag en my las is lig. Vry van die las wat op hulle gelê is, maar wat nie deur die Fariseërs self gedra kan word nie.
Om die genadejaar van die Here aan te kondig. Die boodskap van groot blydskap: Die tyd soos deur God bepaal, is immers besig om in vervulling te gaan. Sy koninkryk het nou naby gekom.
Nou kan ook u en ek, diep bewus van ons onvermoë, besef wat die woorde van Romeine 7: 24 beteken: Ek, ellendige mens! Wie sal my…! Hy doen dit deur Jesus Christus ons Here.
Leef vandag en elke dag as vrygelatene, as een wat sien en besef God se beloftes is ook vir jou vervul, en laat dit jou vervul met blye dankbaarheid.
Ds Hennie Aucamp, Emeritus (25/02/1949 – 04/10/2024)
