Kolossense 2: 14
Ek glo nie een van ons het al ooit spykers as ’n geskenk gekoop of dit as ’n geskenk ontvang nie.
Die skare het gedink die doel van die spykers was om Jesus se hande aan die kruis vas te spyker. Hulle was net half reg. Ons kan hulle nie blameer dat hulle die ander helfte misgekyk het nie. Deur die lens van die Skrif sien ons wat ander gemis het, maar wat Jesus gesien het: Hy het die skuldbewys met sy eise teen ons tot niet gemaak. Deur dit aan die kruis te spyker, het Hy dit vir goed weggeneem (Kol 2: 14).
Tussen Jesus se hand en die kruis was daar ’n lys. Dit was ’n lys van ons foute en ons sondes, sowel as die slegte besluite en keuses wat ons gemaak het. Die lys kan egter nie gelees word nie. Die woorde kan nie ontsyfer word nie. Die foute is toegemaak. Die sondes is versteek. Dié aan die bokant is weggesteek deur sy Hand. Dié verder af is bedek deur sy Bloed. Jou sondes is uitgeblok deur Jesus.
Kolossense 2: 14 sê in Die Boodskap-vertaling: Wat gebeur het, kan ook so gestel word: ons elkeen het ’n rekening van al ons sonde en ’n rekening moet ’n mens mos betaal. Wat met ons moes gebeur oor al die skuld is uiters slegte nuus vir ons. God het egter hierdie rekening met al ons skuld uit ons hande kom vat. Nou staan die skuld nie meer teenoor ons naam nie. Ons rekening hang nou aan die kruis. Jesus wat ook aan die kruis gesterf het, het daardie skuld vir ons betaal.
Jesus het die lys gesien. Hy het geweet dat die prys vir ons sondes die dood was. Romeine 6: 23 sê: Die loon wat die sonde gee, is die dood; die genadegawe wat God gee, is die ewige lewe in Christus Jesus ons Here. Aangesien Jesus dit nie kon verduur om te dink aan die ewigheid sonder jou nie, het Hy die spykers gekies.
Die hande van Jesus het oopgemaak vir die spykers, sodat die deure van die hemel kon oopmaak vir my en vir jou!
Ds Janine Bevolo-Manders, Witfontein
