Efesiërs 3: 14-21; Johannes 3: 16
Mag julle sy liefde ken, liefde wat ons verstand te bowe gaan (Ef 3: 19).
Jy weet dit kan tog nie wees nie, maar hoe is dit dan moontlik? Dit speel hier voor jou oë af. Die vaardigheid en geheimsinnigheid waarmee hierdie kulkuns uitgevoer word, fassineer mense al oor eeue heen en laat mense wonder…
Een ding waarvan ek en jy seker kan wees, is dat God in sy liefde vir ons nie met oëverblindery besig is nie. God se liefde, sy genade en sy verlossing vir elkeen wat in Hom glo, is nie ’n illusie nie. Dit probeer nie ’n indruk skep van iets wat skynbaar onmoontlik behoort te wees nie. In God vind ons die Waarheid wat Hy gestuur het, sy enigste Seun. Hierdie Waarheid is nie ’n afgesaagde partytjietruuk of ’n kulkunsvertoning met indrukwekkende musiek en beligting nie. Hy kom in eenvoud, sodat elkeen Hom kan sien en vind.
Dit behoort ons verstand te bowe te gaan. In God se liefde stuur Hy sy Seun, wetende dat Hy ’n prys gaan betaal sodat ons kan lewe. Jesus weet sy dissipels en volgelinge gaan voete van klei hê. Hy weet dat die woorde wat ons spreek en die dade van ons getuienis nie altyd ooreenstem nie. Hy weet dat daar diegene gaan wees wat Hom gaan volg bloot uit nuuskierigheid, en sommige net vir eie gewin. Maar net soos God nie met ons speletjies van oëverblindery speel nie, net so kan ons dit ook nie met Hom doen nie. Nog minder kan ons dink dat ons daarmee kan wegkom.
Wanneer ons God se liefde ken en die omvang daarvan verstaan, antwoord ons dankbaar en nederig en leef ons toegewyd en gehoorsaam aan sy roepstem:
Hoor my antwoord op u liefde,
neem die gawes wat ek gee.
Maak my diensbaar in die wêreld –
’n getuie tot u eer.
Sterk my swakheid deur u almag;
deur u krag, my nietigheid.
Gee tog, Here, dat my lewe
meer vertoon van dankbaarheid.
(VONKK 205: 3)
Ds Jaco Vogel, Rooihuiskraal
