Markus 1: 14-15
In hierdie kort gedeelte gee Markus vir ons baie inligting. Dit lyk of hierdie ’n baie deurmekaar tyd was. Johannes is in die tronk opgesluit. Dit was ’n tyd van geweld en onderdrukking; armoede, nood en honger; status en mag. Die Joodse geloofsleiers het reeds begin om te wys dat hulle nie oop was vir die Here se boodskap nie. En in hierdie tyd het Jesus met sy aardse bediening begin. Was daar nie dalk ’n beter tyd wat Jesus kon kies om na die aarde te kom nie? Miskien sou die mense meer ontvanklik vir sy woorde wees as dit ’n tyd van vrede was, of ’n tyd van voorspoed. Maar dis nie die tyd wat Jesus uitgekies het nie, Hy het juis gekies om in hierdie moeilike tyd met sy aardse bediening te begin. Ons sien dit in die Bybel en ons sien dit vandag nog. Die Here het nie gewag tot Hy verwelkom word nie. Hy het nie gewag dat daar geen teenkanting was nie. Hy het nie gewag tot almal nou eers hul samewerking gegee het nie. Jesus het nie gekom toe Hy welkom was nie; Hy het gekom toe Hy nodig was.
Dit maak ’n mens nogal nederig om só daaroor te dink. Dit maak dat ’n mens van vooraf dankbaar is. Al voel dit vir my of ek te min het, of dit nie ’n goeie tyd is nie, of die omstandighede moeilik is – die Here het tog gekom. En al is daar soveel donkerte in die wêreld en soveel dinge wat verkeerd loop, kom ék wees vandag die een wat in Jesus se Naam ’n verskil maak.
Gebed
Jesus, dankie dat U na ons toe gekom het. Dankie dat U vir ons lig en lewe gebring het, al is daar soveel hartseer en donkerte en geweld in die wêreld. Help my om vandag u lig te laat skyn. Ek is hier Here, laat u koninkryk vandag ook deur my nader kom.
Ds Pieter Rossouw, Mafeking / Zeerust
