Hoe kry ek my gemeente om in pas met God se missionale ritmes te begin beweeg? Want soms raak ’n gemeente vasgeval in die moeras van kerk en kultuur en kort dit ’n hupstootjie. By IN PAS praat ons van hefboompraktyke wat gemeentes hiermee kan help.
Daar is tans 15 gewoontes en 45 praktyke geïdentifiseer by gemeentes wat intensioneel met God se missionale roeping probeer leef. Hoe groter ons netwerk groei, hoe meer ontdek en leer ons by die inspirerende stories wat op gemeentevlak uitspeel. Dit maak ons baie opgewonde oor die toekoms en die rol van die kerk.
Daar word begin met die basiese dinge van die IN PAS-reis, die sogenaamde Hefboompraktyke.
’n Missionale avontuur hoef nie ingewikkeld en kompleks te wees nie. Dit is ook nie abstrak en teoreties nie. Dit behels spesifieke gewoontes en praktyke wat uitspeel in die unieke ritme van die gemeente en haar konteks. Maar dikwels is ’n gemeente vasgeval in die modder van kerk en kultuur. Dis veral dan dat die bewegings van missionaliteit nie maklik kom nie en dikwels lei tot weerstand en konflik.
So, waar sal ’n mens begin wanneer ’n gemeente al soveel keer probeer begin het, maar nooit regtig in beweging gekom het nie? Hoe kom ’n gemeente uit die modder van ’n ou manier van kerkwees, terug op die pad vorentoe en in pas met God se missionale roeping?
Jy beweeg van dink na doen. Of dalk vir eers net oefen om te doen.
Soos Alan Hirsch dit stel: Act yourself into a new way of thinking. Want think yourself into a new way of acting werk nie.
Een van ons IN PAS-spanmaats vertel dat sy vrou hom gereeld daaraan herinner dat predikante die enigste mense is wat sy ken wat dink dat as hulle iets gesê het, dit klaar gebeur het! As musiekonderwyser weet sy hoe belangrik praktiese inoefening is vir nuwe vaardighede om te kan ontwikkel.
Uit die lys van 45 praktyke het ons 11 geïdentifiseer wat soos ’n hefboom die gemeente uit die modder kan lig en in beweging kan bring. Afhangende van waar die gemeente in die modder vassit, het elke praktyk ’n unieke rol om te speel. Die grafika hiernaas is ’n poging om die hefboompraktyke te groepeer ten opsigte van die lewe van die gemeente in verhouding met God en die gemeenskap.
Dis immers waaroor IN PAS gaan.
Wat is dit?
Eerste dinge eerste.
Wandel in die Woord is ’n praktyk van luister na die Woord van God, waar ’n groep ’n redelik kort gedeelte oor ’n lang tydperk gereeld saam lees. Vandaar die term “wandel in”. Ons “loop stadig deur” die Woord.
Elke keer wanneer die teks gelees word, luister deelnemers eers self na die teks en dan na iemand anders in die groep. Een van die kernwaardes van Wandel in die Woord is dat die ander persoon vrymoedig moet voel om te deel wat hy of sy in die Bybelgedeelte gehoor het.
Terug in die groot groep sal deelnemers vertel wat hulle by die ander persoon gehoor het, in stede van ’n herhaling van dit wat hulle self gesê het. Wandel in die Woord is dus in wese ’n luisteroefening.
Herhaaldelike beoefening van Wandel in die Woord, byvoorbeeld in kerkraadsvergaderings, help dat ’n hegte geloofsgemeenskap gevorm word binne die raamwerk van die Woord. Dit skep ’n klimaat waarbinne besluite en maniere van doen gevorm word deur die verhaal van die Bybel. En ons leer om geloofs- en Godsvrae te vra.
Oor tyd, ontwikkel dit ’n deurleefde missionale verbeelding.
Opsomming van die ritmes, gewoontes en praktyke
RITME I – ONTDEK EN VIER
Gewoonte 1 – Sigbaar vier
Praktyk #2: Godstories
Praktyk #3: Daaglikse ondersoek
Gewoonte 2 – Ontdek God se reis met ons
Praktyk #4: Ontwikkel ’n verslag oor die gemeente se kultuur (leesverslag)
Praktyk #5: Ons onderskei ons patrone van gestuur-wees
Praktyk #6: Ons doen ’n storiemuur
Gewoonte 3 – Ontdek medereisgenote
Praktyk #7: Stel ’n gemeentelike begeleidingspan saam
Praktyk #8: Vorm ’n gemeentenetwerk (cluster)
RITME II – LUISTER EN ONDERSKEI
Gewoonte 4 – Word stil en ontvang God se teenwoordigheid
Praktyk #9: Stilword
Praktyk #10: Hou ’n joernaal
Gewoonte 5 – Lees die Woord luisterend
Praktyk #11: Wandel in die Woord
Praktyk #12: Lectio Divina
Gewoonte 6 – Onderskei God se wil vir ons
Praktyk #13: Vra Godsvrae
Praktyk #14: Luister na die Gees
Praktyk #15: Vra Woordvrae
Praktyk #16: Voer ’n “egte gesprek”
Praktyk #17: Die luistersiklus
RITME III – WAAG EN EKSPERIMENTEER
Gewoonte 7 – Betree die vreemde
Praktyk #18: Beplan die eerste treë
Praktyk #19: Wandel in die wêreld (Son)
Praktyk #20: Verwelkom die vreemdeling (gasvryheid)
Praktyk #21: Stap’n pelgrimstog
Praktyk #22: Die luisterplons
Praktyk #23: Gebruik erediensreekse
Gewoonte 8 – Bou vennootskappe
Praktyk #24: Vestig vennootskappe
Praktyk #25: Vorm bruggemeenskappe
Gewoonte 9 – Eksperimenteer
Praktyk #26: ’n Lae-risiko-eksperiment
Praktyk #27: Die eksperimentele plons
RITME IV – VERHELDER EN FOKUS
Gewoonte 10 – Ons kyk in die spieël
Praktyk #28: Waar op aarde is ons?
Praktyk #29: Vestig luistergeleenthede
Praktyk #30: ’n Groot vraag aan die gemeente: Waarvoor roep God ons – hier en nou?
Praktyk #31: Die National Church Life Survey (NCLS)
Gewoonte 11 – Ons leer ons gemeenskap ken
Praktyk #32: Ons luister wat in die gemeenskap aangaan
Praktyk #33: Ons kyk met nuwe oë na die gemeenskap
Praktyk #34: Ons leer om na patrone te soek
Gewoonte 12 – Onderskei roeping en fokus
Praktyk #35: Vind die fokus van ons roeping
RITME V – IMPLEMENTEER EN INOEFEN
Gewoonte 13 – Leiers wat deur voorbeeld lei
Praktyk #36: Ontwikkel roepingsgesag
Praktyk #37: Aktiveer missionale intelligensie
Praktyk #38: Ontwikkel ’n lewensritme (Regula)
Gewoonte 14 – Skep konkrete aksies
Praktyk #39: Gee die eerste treë
Praktyk #40: Belyn die gemeentelike aktiwiteite
Praktyk #41: Die leierspanverbintenis
Praktyk #42: Hanteer polariteit en konflik
Gewoonte 15 – Begeleiding
Praktyk #43: Ontwikkel geloofsgewoontes
Praktyk #44: Ontwikkel vaardighede
Praktyk #45: Ontwikkel nuwe oefeninge
(Individuele skrywers dra self verantwoordelikheid vir die feitelike inhoud van en beskouings in hul artikels.)
