1 Johannes 4: 16b – 5: 5
Waar kom liefde vandaan? Johannes skryf liefde is nie iets wat van ons mense af kom nie. Liefde kom van God af. God is liefde! As ’n mens wil weet wat liefde is, moet jy nie die antwoord op die aarde soek nie. Jy begin by God en sy liefde. Sy liefde vir ons mense was ook geen goedkoop liefde nie. Om vir ons lief te wees, kos ons Vader baie duur. Om ons los te kry uit die regverdige oordeel, was Hy verplig om sy eniggebore Seun, Jesus Christus, Mens te laat word, om in ons plek die lyding, smart en dood te dra.
God leer ons dat ware liefde gee, baie gee, voordat dit vra. Maar let op, ware liefde gee nie net, en gee en gee en gee nie! Nee, uiteindelik vra dit ook. Liefde kan nooit net van een kant af kom nie, ware liefde is ’n band wat meer as een aanraak. God verwag dat die liefde wat Hy vir ons het, ons stewig aan Hom moet vasbind, maar ook aan mekaar. God verwag van sy kinders om mekaar ook lief te hê. Is dit die liefde wat ons ken? Baie van ons is deel van ’n huisgesin – pa, ma en kinders. Ons is ook lidmate van gemeentes – ’n huisgesin van God in ons omgewing. Sien ons mekaar raak en is ons werklik lief vir mekaar soos broers en susters vir mekaar lief moet wees?
Neem vandag ’n besluit om moeite te doen om ook die mense in u gemeente wat u nog nie ken nie, te leer ken. Ons kan vir mekaar onvoorwaardelik lief wees, want God het ons eerste onvoorwaardelik lief gehad. Ons kan vir mekaar lief wees, want liefde kom nie van ons af nie, liefde kom van God af. Hy gee dit vir sy kinders om dit ook met mekaar te deel.
Gebed
Liefdevolle Vader, help ons om lief te hê soos U ons eerste lief gehad het. Amen.
Ds Stephan Botha, Rustenburg-Suid
