Esegiël 33: 30-33
Esegiël se woorde het die mense vir ’n oomblik opgewonde gemaak, en toe het dit weer net so verbygegaan. Amper soos wanneer ons vandag ’n radio saggies in die vensterbank sal aanskakel en met ’n halwe oor luister, terwyl jy voortgaan met jou dag. So was dit ook met Jesus. Die mense het nie altyd mooi verstaan waarmee Hy regtig besig was nie en daarom het hulle nie eintlik geweet wat om met sy boodskap te maak nie. Die een dag kon die skares nie genoeg van Hom kry nie en daarna het hulle geskree dat Hy gekruisig moet word. En uiteindelik moes hulle ook erken: Hier was werklik ’n Profeet tussen ons.
Kom ons onthou vandag weer hoeveel Jesus se woorde regtig vir ons beteken. Hy het vir ons kom wys hoe ware geregtigheid lyk. Hy het vir ons God se koninkryk nader gebring. Hy het versoening tussen ons en God gebring, en ook vrede tussen mense. Sjoe, dit klink baie mooi! Ek hou daarvan om dit te hoor, ek sal graag nog ’n bietjie na Jesus wil luister… Maar dit kan nie daar stop nie. Hierdie mooi woorde van Jesus moet my beweeg, dit moet my beïnvloed, dit moet my binnekant roer. Nou gaan ek iets daarmee doen! Ek gaan nou Jesus se woorde gebruik om my lewe aan te pas by God se wil. Ek gaan mooi oplet na Jesus se goeie voorbeeld en dit gebruik om nader aan God te leef. Ek gaan fyn luister na dit wat Jesus vir ons geleer het, sodat ek sal weet hoe om reg op te tree in elke situasie.
Gebed
Here Jesus, help my vandag om nie net u woorde te hoor nie, maar om ook iets daarmee te doen. Laat u woorde nie net soos ’n mooi liedjie op die radio in die vensterbank speel nie, maar help my om met aandag te luister. Laat u woorde my binnekant roer, my beweeg, en my help om nader aan U te leef. Amen.
Ds Pieter Rossouw, Mafeking / Zeerust
