Markus 1: 21-28
My medegelowige, hou in gedagte dat die Woord van God besig is om in vervulling te gaan. Vervulling wat sal uitloop op die vergewing van sonde en die oorwinning oor die dood. Die beloofde Gesalfde het gekom en Hy moet Hom nou bekend laat word. Die boodskap van vergewing en die ewige lewe deur in Hom te glo as die Seun van God, moet verkondig word in direkte stryd teenoor die leer van die Fariseërs.
In die gelese gedeelte het ons gehoor dat Jesus die mense leer. So maak Hy hom bekend deur die woorde wat Hy as Profeet tot hulle rig. Hy leer nie net soos een met gesag nie, Hy het ook gesag en mag oor die bose!
Hy verrig wonderwerke en Hy toon aan dat Hy die mag en gesagsdraer oor alles en almal is. Die mense is verslae. Opvallend dat selfs die bose nie net weet wie Jesus is nie, maar Hom erken as die Heilige, die Afgesonderde, die Gesalfde van God. Tereg word daar uitgeroep: Dit is ’n nuwe leer en dit kom met gesag! ’n Nuwe leer, maar tog soos van die begin af deur God bepaal.
Dan lees ons in vers 28: En dit was nie lank nie of … oor Hom gepraat. Die suurdeeg het begin werk! Stelselmatig begin die boodskap van hoop en bevryding versprei, en so sal die aanslag nou teen Hom toeneem om van Hom en die nuwe leer ontslae te raak.
Maar my medegelowige, wees waaksaam. Die suurdeeg van die Fariseërs en Herodes is nog net so sterk aan die werk as tweeduisend jaar gelede. Die kreet Kruisig Hom eggo steeds. Dalk harder as voorheen, en nou ontstaan daar twee vrae. Laat ek my meesleur deur die massa en dryf ek stelselmatig so weg dat ek dalk met my woorde, gedagtes en dade ook uitroep Kruisig Hom!, of laat ek Hom vandag nog bekend word as draer van die evangelie?
Ds Hennie Aucamp, Emeritus (25/02/1949 – 04/10/2024)
