Lukas 8: 1-3 (AFR2020)
Vir baie kinders is dit soms ’n asemrowende belewenis om naby ’n pa of oom te staan wat besig is om ’n motor se enjin reg te maak. Daar word gegryp na ’n tang, dan ’n skroewedraaier en volgende ’n reeks verskillende groottes moersleutels (spanners) wat om die beurt gebruik word. As kind moet jy net gryp, aangee, en seker maak jy hou die lig waar daar gewerk word. In daardie gereedskapkis het elke item nie dieselfde finansiële waarde nie, maar wanneer dit benodig word, is dit die belangrikste.
Soms is dit die indruk wat ’n mens begin kry van ons as mense in God se koninkryk. Van die kant af, heg ons nie aldag ewe veel waarde aan die instrumente wat God in sy koninkryk gebruik nie, maar vir God is niemand minder werd nie. Elkeen vervul ’n belangrike rol. In hierdie teks van Lukas sien ons dat Maria, iemand wat definitief nie ’n goeie naam kon gehad het nie, se naam op gelyke waarde staan langs Johanna, ’n vrou met ’n groot naam. Maria se identiteit word gegee as die vrou uit wie daar vele demone verdryf is. Johanna word geken as die vrou van Gusa, ’n bestuurder van Herodes, wat van haar ’n vrou met taamlike status gemaak het. In die koninkryk van mense, is Johanna en Maria ver van mekaar, maar in die koninkryk van God werk hulle nou langs mekaar. Uiteindelik het jou rol as instrument in die hande van God niks te make met wie jy is of waar jy vandaan kom nie, maar of jy jouself in die gereedskapkis van die Here beskikbaar stel.
Mag ons kies om onsself nie deur die oë van mense te sien nie, maar deur die oë van ons Skepper wat ons almal geskep het vir sy gereedskapkis.
Ds Schalk Zastron, Ermelo
