Markus 8: 34-38
In die Lydenstyd dink ons aan Jesus se laaste reis van Galilea na Jerusalem. Ons is enersyds in die tyd op reis saam met Jesus tot waar Hy eindelik op ’n donkie die stad Jerusalem sal binnery, maar ons is andersyds op reis na die ewige Jerusalem. Markus 8 sê wie sy lewe vir homself wil behou, sal dit verloor. Dit beteken dat as ons saam met Jesus wil lewe en die ewige Jerusalem wil binnegaan, moet ons ook eers saam met Hom sterwe. Ons moet in onsself sterwe sodat ons daagliks meer soos Jesus kan word. Dit verg dikwels opoffering en selfverloëning.
In 1933 het Hitler die kanselier van Duitsland geword. Verskeie beperkinge is in dié tyd aan predikante en geestelike leiers in Duitsland gestel. Amerikaanse predikante en teoloë het egter daarvan te hore gekom. Een van die predikante wat in Duitsland swaargekry het, was die teoloog Dietrich Bonhoeffer. Daar word ’n werksaanbod vanuit Amerika aan hom gemaak in ’n poging om vir hom ’n veilige hawe te skep. Op 4 Junie 1939 vertrek hy na Amerika – ver weg van die krisis en dreigende gevaar in Europa.
Maar na sy aankoms in Amerika bly Bonhoeffer rusteloos. Hy raak al hoe meer oortuig daarvan dat hy tydens die oorlog by sy mense in Duitsland moet wees en hulle geestelik moet begelei: dat hy saam met hulle moet ly. En op 7 Julie 1939, skaars ’n maand later, doen Bonhoeffer die ondenkbare. Hy klim op die skip terug Duitsland toe. Hy is oortuig daarvan dat as hy nie tydens die oorlog saam met sy mense ly nie, hy hulle ook nie ná die oorlog sou kon begelei nie. Op 9 April 1944 sou Bonhoeffer met sy lewe boet.
Mag hierdie Lydenstyd ’n tyd wees waarin ons diep nadink oor die eise van dissipelskap. Jesus sê in Markus 8: 34: As iemand agter My aan wil kom, moet hy homself verloën, sy kruis opneem en My volg.
Lees Gesang 391: 1.
Ds Lydia Miller, Villiers
