Johannes 1: 1-18
Medegelowige, om die volgende sewe dae se Skrifgedeeltes beter te verstaan, moet ons die politieke omstandighede en godsdienstige oortuigings van Israel tydens Jesus se omwandeling in gedagte hou.
Die politieke omstandighede: Die volk Israel is deur die Romeine oorheers en dit het daartoe aanleiding gegee dat daar gesmag is na die herstel van die glorie van die volk soos in die tyd van koning Dawid. Vir die moontlike vervulling van hierdie aardse verwagting, het baie hul hoop op Jesus as aardse koning gevestig. Die dissipels: Here, is dit nou die tyd… (Hand 1: 6). Die Emmausgangers: Ons het so gehoop… (Luk 24: 21).
Die godsdienstige oortuigings: Die leer wat die Fariseërs verkondig het dat die volk deur die stiptelike onderhouding van die wet en die bring van offers vergifnis en herstel sal ontvang. Hierdie leer het aanleiding gegee tot ’n baie winsgewende besigheid. Markus 11: 15-19: Maar julle het dit ’n rowersnes gemaak. Hierdie godsdienstige tradisie, hierdie vyeboom, moet tot in die wortel verdroog. Dit moet verander.
Dit is tydens hierdie politieke en godsdienstige verwagtinge dat Johannes die Doper as die voorloper, en dan ook Jesus self, moet verkondig dat God se beloftes in vervulling gaan. Sy koninkryk het naby in die lewe en werk van Jesus gekom. Hy moet die evangelie so verkondig (Matt 11: 30: My juk is sag en my las is lig). Nie deur onderhouding van die wet en offers nie, maar uit genade en deur geloof.
Verstaan jy nou waarom daar van Jesus ontslae geraak moes word? Herodes het dit al probeer deur die kindermoord. Jesus hou ’n bedreiging vir ons aansien en winsgewende praktyke in. Daarom weergalm die uitroep: Kruisig Hom! Kruisig Hom!
Het ek vandag dalk deel daaraan?
Wanneer Jesus en Johannes uitroep Bekeer julle! is dit nie soseer van ’n sondige lewe nie. Ja, dit ook, maar eerder ’n wegkeer van die soeke na selfregverdiging en ’n omkeer na Hom by wie daar ware redding te vind is.
Ds Hennie Aucamp, Emeritus (25/02/1949 – 04/10/2024)
